Inkhawmpui lian neihna tur enpui
Tuivawl bialtu MLA Lalchhandama Ralte chuan August 19 khan Sakawrdaia YMA Inkhawmpui Lian vawi 75-na neihna tur pandal sak mek a tlawh a. August 20 khan Darlawnah Salvation Army Youth Congress 2025 thlenna tur pandal sak mek a tlawh bawk.
YMA Inkhawmpui Lian Organising Committee hruaitute nen an thutkhawmnaah Lalchhandama Ralte chuan khawmpui lian atan a theihtawpa hma a lak thu leh sawrkar a dawr dan a sawi a. Organising Committee pawhin hna hautak zual an zo tawh a, mikhual thlen dan tur an relfel tawh tih an sawi.
Nilaini khan Darlawna SAY Congress 2025 neih turah Organising Council nen an thukhawm bawk a. Hmalakna report ngaihthlak a ni a. MLA hian khawmpui a hlawhtlin theihnan theihtawp chhuahpui a tum tih a hrilh.
Sakawrdai leh Darlawn a tlawh rualin MLA hian inkhawmpui panna tur kawng, NH 150 Khawruhlian hnuaia leiminin kawng a tih bal, lirthei lian kal thei tura siam chu a enfiah nghal a ni.
Salvation Army thalai khawmpui lian, SAY Congress hi October 3-5 chhungin ah Darlawnah neih tur a ni a, YMA inkhawmpui lian hi October 21-23 chhung Sakawrdaiah neih tur a ni.
Inkhawmpui lian neihna tur enpui
