A hma kar chiaha German football season khuhhawnna German Super Cup-ah goal khung zo loin England captain Harry Kane chuan RB Leipzig lakah a club thar Bayern Munich chu sithum faiin a tlawmpui a, karliamta Zirtawpnia zana a Bundesliga debut erawh a dan a dang ta zak a, 4-0 tehrenga Werder Bremen an sawpna inkhelah goal khat thunin, assist vawikhat a nei bawk.
Tarlan tak angin, Leipzig game-ah khan second half substitute niin a team tlawm tur a chhan zo lo a, Bundesliga lama a bultanna inkhelah erawh Tottenham Hotspur striker hlui hian Bayern Munich player man to ber a nihna phuin a khel a, a laka league record siama Bavarians-in euro maktaduai 100 (USD 108.68 million) an sen ngamna chu goal leh assist hmangin a chhanglet ta phawt.
League season thar bultanna inkhelah Bundesliga champion tan Leroy Sane chuan tan atanga minute lina lekah Kane siamsak atangin goal hmahruai a thun a; second half minute 74-ah Spurs captain hlui hian a club thar tana a goal hmasaber khung chhun-zawmin, minute 90-ah Sane bawkin a goal hnihna leh Bayern goal thumna a tilut a, hun pekbelha Mathys Tel-a goal khat thawh ve leh nen Munich club hian Werder Bremen lakah 4-0 hnehna nuamsa an chang.
Inkhelh bana amah bawrtu chanchinbumite hnenah Kane chuan, “Tlai lam hun duhawm tak chu a nih kha. Inkhel hautak ni mah se bul kan tan tha a, goal kan khung hma a, second half-ah kan tan harsatna rawn siam viau bawk mah se kan goal hnihna ka khung ve thei hlauh a, midangin bench atanga lutin an rawn chhunzawm bawk.
“League bultannate a ni ve bawk a, ka phurin, ka nervous ve hlek lo thei lo a, Bayern tana ka match hmasaber ni lo mah se kan game khelh hma khan ka nervous tih ka pha lo,” a ti.
Inlan vawihnihnaah Kane chefuh ta
