Inland waterway project atan
Mizoramin sum dawng ve dawn
2nd Inland Waterway Development Council thutkhawm chu Zirtawpni khan Kaziranga Assam-ah neih a ni a, Transport minister Vanlalhlana pawh telin, Transport secretary Zosangliana leh director Er R Lalrammawi ten an tawiawm.
Thutkhawmah hian Inland Waterway Authority of India hmalakna sawi a ni a. State 21 leh UT tan cheng vaibelchhe 1405.26 hu project hawn a ni. Chu’ng zingah chuan Mizorama IWT project kalpuina tur cheng vbch. 12.1 a tel. Quick Pontoon Opening Mechanism pahnih – Bihar leh Uttar Pradesh ami tlangzarh a ni a. Central database module leh certificate hrang hrang – vessel registration certificate leh a pek dan tur, annual survey certificate leh Inland Vessel Navigation Training Institute-in a pek tur course completion certificate hawn a ni bawk. Heng bakah hian National River Traffic & Navigation System hawn a ni a, top cargo owners/ movers hnenah lawmawm sem a ni.
Mizorama Inland Waterway Transport project chu – IWT for River Tlawng, IWT for River Chhimtuipui leh Construction of IWT Infrastructure on Khawthlangtuipui – Tuichawng, Lunglei district a ni.
Assam chief minister Himanta Biswa Sarma leh Union minister for Ports, Shipping and Waterways Sarbananda Sonowal-te kaihhruaia thutkhawmah hian Mizoram Transport minister chuan Mizoram chu tlangram a nih avanga mihring phur leh bungraw phurh luh lamah harsatna a awm thin a. Inland water transport changtlung tak hmangin heng harsatna hi thui tak sutkian theih a ni dawn tih a sawi. Mizoramah lui lian, inland waterway kalpui theihna tam lo mah se, a awmchhun tangkai taka hman a nih chuan inkalpawhna kawnga harsatna leh zinmite phurrit engemawchen chhawk zangkhai a ni dawn tih a sawi a ni.
Mizoramah Inland Waterway Development hnuaia hma lak a nih chuan, ram leilungmite hlawkpuina tura ruahmanna siam ngaihpawimawh nise a duh tih pawh Vanlalhlana hian sawiin, “Inland water transport subject hi Transport department kutah kum 2019 khan dah tan chauh a ni a. Covid-19 avangin hmalakna engemawchen khawtlai mah se, a remchan dan ang angin bawhzui reng a ni,” a ti. Tuirial Dam chungchang sawiin, mihring leh bungrua phurhna atan leh 2nd IWDC thutkhawmin tihhmasawn leh tihchangtlun a tum em em, River Cruise Tourism kalpui theihna hmun pawimawh tak a ni tih a sawi bawk.
Inland waterway project atan Mizoramin sum dawng ve dawn
