Inngaihzawn hnua inlaichinna chungchanga i hriat thar tur te
In hmangaih hnuah chauh ingaihzawnna chungchanga hriatfiah thil tam tak kan nei thin. A hmaa ni tura kan ngaih ang lo ni ta chiah lo te, a hmaa kan ngaihtuahna a ni lo tura kan ngaih lo ni ta si te pawh a awm thin. Tun tumah hian relationship lama mithiam ten inhmangaih hnuah kan hriatfiah tak chauh ni a an sawi te kan rawn tarlang e.
1. Perfect partner an lo awm tak tak lo. Tumah ‘perfect’ an awm lo, nang pawh i ‘perfect’ lo, chuvangin perfect partner an lo awm lo tih i hrechhuak ang. I ngaihzawng nen chuan in hlim dunin nuam inti viau a nih chuan, ani chu i kawppui awm mi tak a ni tihna a ni ang. Tu emaw nen kan inngaihzawn hian keimahni lamah engtin emaw tak kan insiamrem ve thin a, chu chu thil tha tak a ni a, chutianga kan insiamrem thin avanga hlim taka inngaizawng thei te pawh kan ni thin.
2. In inhmangaihna thawnthu chu i lo suangtuah thin anga nuam veng veng a ni reng dawn lo. In love story chu eng anga ngaihnawm pawh ni se mihring nun hi nuam reng a awm thei lo. Mitin hian danglamna kan nei theuh a, kan thil thlir dan leh ngaihdan te hi zan khat thil thuah tuman min thlak sak vek thei bik lo. I ngaihzawng chuan rose par a pek loh chang che a awm dawn a, a fak reng loh hun che te pawh a awm dawn a, i lo beisei leh suangtuah a, inhmangaih veng veng reng mai boruak kha a ni reng dawn lo, mahse, mahse, chuvang chuan a hmangaih ta lo che tihna a ni chuang lo.
3. Ngawih reng pawh hian thu tam tak a sawi thei tih te pawh i hre thar ang. I ngaihzawng nen chuan in titi tawp hleithei thin lo a, sawi tur in ngah em em zel a nih pawhin, a chang chuan engmah sawi lo va ngawi renga awm dun pawhin hmangaihna thu tam tak a sawi thei tih i hrechhuak ang. Inbe reng lo chung pawha inngaihzawnna boruak te pawh i la tawng ang, tuna be lo va awm hleithei lo, engtik lai pawha biak reng duh boruak ang kha a ni reng lo tihte pawh i la hrechhuak dawn.
4. A thil chin than ngei zawng tak i nei tih te pawh i la hrechhuak ang. Inrim lai hi chuan tute pawhin that kan chhuah a, kan ze tha ber angin kan inlantir a, theih tawpin a tha lo lam chu kan inthup thin. Mahse, inngaihzawn tak tak hnuah chuan kan nihna dik tak a rawn lanchhuah hun a awm thin. I ngaihzawng chu nitin a rimtui chem chem dawn lo va, a nalh reng dawn lo va, a polite lo mang e i tih chang te pawh a awm ang. I rin aiin a lo thatchhe ru zêk pawh a ni thei a, a che tawp ru riau te pawh a lo ni maithei. I bula vawih emaw hnapkhir kheuh emaw inhiah deuh neuh neuh emaw irh deuh uk uk emaw te pawh kha a inthlahrun loh riau hun a awm dawn tlat.
5. Inhmangaih tur hian beih ve ngial a ngai tih te pawh i hrechhuak dawn. I hna i thawh thin ang tho khan hmangaihna atan pawh thawh a ngai tih i la hria ang. In inngaihzawn tan tirh atang khan in inhmangaihna chuan ama tawkin zual lam a pan zel dawn emaw i tih chuan tihsual palh a hlauhawm tlat. Hmangaihna chu tihpun a ngai a, tipung turin tha thawh a ngai tih te i hrechhuak ang.
Inngaihzawn hnua inlaichinna chungchanga i hriat thar tur te
