Kan tunlai khawvelah engkim hi kan ‘online’ a ni deuh ber tawh mai a. Online-ah thian a chhar a, online-ah a ngaihzawng nen an intawng a, a hna tur pawh online kaltlang a dil leh a hmuh te a ni a, social media hian kawng engkimah min luhchilh tawh a ni ber mai. A nih leh, chu social media chuan engtin nge i kawppui nena in inkar kha a nghawng ve le?
Ngaihzawng neih veleh kan relationship status online-ah a rawn lang nghal a, chutihlaiin a pakhat zawkin a relationship status a thlak ve lo a nih chuan a pakhat zawk ngaih a ti tha lo nghal ringawt! Midang lakah min zahpui a niang tih ngaihdan a nei thei a, miin ngaihzawng a nei tih hre lo se a duh a niang tih te, ngaihzawng nei lo anga lan a duh a niang tih te leh, midang tan a ‘available’ tih lantir a duh vang a niang tih ngaihdan thlengin a nei nghal thei a, chu chuan a rilru a tibuai nghal pang dawn a ni.
‘Like’-tu nghah lama inel hi a awl khawp mai, eng ema wkan post a, chu chu tu ten emaw an lo ‘like’-a, mahse, social media-ah hian kan kawppui te nen kan thil post-ah tunge ‘like’-tu ngah zawk ti a a ruk taka inelna hi a awm duh riau. Kan sawi chhuak hauh lo nain, kan tang ru teuh thin. Hei hian a rei hnuah boruak tha lo a chhem chhuak thei ve tlat.
I kawppui nen chuan inpawh nel tha hle mah ula, i ‘ex’-in eng emaw a post a chhiar fuh khan i kawppui chu a buai ru nghal tlat zel, thikna thinlung a awm nghal mai thin. I ‘ex’ in i post a like emaw, i ‘ex’ post i like emaw, i chhiar emaw khan thikthu a awm nghal thei bawk. I kawppui kha hetiang post velah hian a buai riau zel a nih chuan, in buai thuai ang.
Social media-a a post leh comment te kha nangmah a biakna che anga i ngai a nih chuan in ngaihtuah harh a hun. A tak rama nun kha a pawimawh zawk daih a nia. Social media kaltlanga hlir maia ngaihzawng te nena inkawm chuan a tak ramah buaina a thlen hma dawn riau.
Kawppui te enthla ti tih, veng ti tih a awm a awl riau. Social media-ah eng nge a post, tu post nge a ‘like’, tuin nge a post ‘like’ tih vel khan a tibuai viau mai thei che. Chutiang hriat tum chuan i thlithlai a, i check deuh sek a, i nun a hahdam lo zo vek dawn a ni. Chutiang bawkin ani pawhin a lo ‘check’ ve reng thei che a, khatianga in-check tawn khan, nun zalen lo, nun chêp intihna neih a awl dawn hle a nia.
Social media hi kan rilru tawt inphawrhna atana hmang te pawh kan tam ta a, kan kawppui te nena kan inkar, boruak fuh vak loh chang te pawh a inpaih thawl nan kan hmang ta fo mai. Hetianga thil kan post hian a lo chhiartu tan kan rin aiin a na thei zek a nia. |awngkam nêm deuh i hmang emaw i tih pawh khan a lo dawngsawngtu tan chuan a dengkhawng viau mai thei. I kawppui chuan i post a hmu ngei dawn a, WhatsApp status danglam hlek pawhin eng emaw awmzia a nei tawh thin si a!
Inngaihzawnnaah social media-in \angkaina a nei em?
