Congress leader Jairam Ramesh chuan Bharatiya Janata Party te chuan inthlang mai tur Chhattisgarh-ah eng issue mah an nei lo va, inthlana chak an tum dan hmanrua chu ‘innghirnghona thlentir’ a ni ber, tiin a sawi.
State mipuite chuan BJP te thendarhna policy chu an hnawl dawn tiin Rajiv Bhagan, Congress office a news conference a neihnaah Jairam Ramesh chuan a sawi a.
“Chhattisgarh-ah BJP te hian issue engmah an nei lo. Polarisation bak eng issue mah sawi lana kalpui tur an nei lo. Home Minister leh Assam Chief Minister thusawi te chu polarisation chungchang a ni ber,” tiin a puh bawk.
Congress te chuan Union Home Minister Amit Shah leh Assam Chief Minister Himanta Biswa Sarma tena campaign rally an neihnaa an thusawi chungchangah Election Commission of India hnenah an zualko bawk a.
Election Commission chuan kar kalta khan Chhattisgarh minsiter Mohammad Akbar chungchang a sawi kaihhnawihah Sarma hnenah show-cause notice a pe a ni.
Ramesh chuan BJP leader te Prime Minister Narendra Modi leh Uttar Pradesh Chief Minister Yogi Adityanath te pawhin campaign an neih hunah ‘polarisation thlek sa ran rilru pu in’ an lokal ngei dawn tia sawiin mahse Congress chuan an hmalaknaah engmah hlauh a nei lo tiin a sawi bawk a.
“BJP leh RSS te hian innghirnghona politics kalpuiin sakhua, hnam leh tawng te behchhana communal harmony tichhiaa mipuite thendarha vote hui an tum a ni. Chungte chu Uttar Pradesh, Rajasthan leh Madhya Pradesh ah te an lo kalpui tawh a. Manipur thil thleng mek pawh hi chu mi hrin chiah chu a ni,” tiin Congress leader chuan a sawi bawk.
‘Innghirnghona thlentir’ hmangin BJP chak tum : J.Ramesh
