Nilaini khan Manipur-a Zo hnahthlakte’n inrelbawlna hran ngiatin
hmun hrang hrangah kawng an zawh a, Manipur pawnah pawh kawng zawh an awm. Manipur-a Zo hnahthlakte tana inrelbawlna hran ngiata kawng hi zawh an ni.
Manipur-a Zo hnahthlakte intelkhawmna Zo United-in kawngzawh hi an huaihawt a, Manipur pawna Zo hnahthlakte pawhin a theih ang anga lo thlawpin, hemi ni hian mahni state governor hnenah union home minister lehkha tur an thehlut.
Hriat theih chinah Manipur state pawn hmun hnihah kawng hi an zawh a; Tripura-ah Zampui Tlang Joint NGO huaihawtin Vanghmunah kawng an zawh a, an BDO kutah union home minister lehkha tur an thehlut. Delhi-ah Manipur Tribal Forum te’n kawng an zawh bawk.
Manipur-ah chuan hriat theih chinah Tegnopal-ah te, Kangpokpi-ah te, Saikul-ah te, Ankhasuo-ah te kawng an zawh a, Pherzawl district-ah hmun 11-ah kawng an zawh bawk.
Zo United hruaitute hnen atanga thu dawn danin, kawngzawhah hian Manipur-a Zo hnahthlakte’n inrelbawlna hran an ngiatna, India sorkarin ngaihtuah thuai se tih chu an auhla a ni a, hmun hrang hranga kawng an zawh hnu hian inrelbawlna hran ngiatna chungchang ngaihtuah thuai an phut thu hi ziakin, union home minister hnena thleng turin sorkar lama mahni bialtu lu ber hnenah theuh an thehlut a ni.
Hriat theih chinah Kolkata, Bangalore, Shillong, Guwahati leh Aizawl-ah te anmahni thlawptute’n lehkha hi an thehlut a, Aizawlah chuan NGO Coordination Committee te’n larsap hnenah an thehlut.
Kawngzawh hi Lamka-ah an thahnem ber nia hriat a ni a, Lamka atanga thu dawn danin, mi sing li velin km 4 vel kawng hi an zawh a ni.
Inrelbawlna hran ngiatin Zo hnahthlakte’n kawng zawh
