President Donald Trump-a chuan Pakistan-a US leh Iran inkara remna zawnga inbiaknaah hlawhtlinna a awm loh hnuah United States Navy-in Strait of Hormuz chu an dang ‘nghal dawn’ tih a sawi.
Trump-a hian Pathianni khan social media-ah Iran chu ‘mi thil chhuhah’ a puh a, US Navy chuan tu ram tuipui bik mah ni lova lawng, strait paltlang tura Iran hnena toll (pawisa) lo pe tawhte chu an man ang a, an kal an khap dawn tih a sawi.
“Thil thleng chu hei hi a ni a, inbiakna a kal tha a, point tam zawkah inrem mah se point pawimawh tak pakhat, NUCLEAR-ah inremna a awm thei lo,” tiin Trump-a chuan a sawi a. “Tun atangin United States Navy, khawvela tha ber chuan Strait of Hormuz-a luh tum leh chhuah tum lawng eng pawh DAN hna an thawk tan dawn a ni,” a ti bawk.
Iran hian khawvel-a energy sumdawnna atana kawng pawimawh tak, Strait of Hormuz chu a thunun ta hi February 28-a US leh Israel tang dunin an ram an beih atang khan a thunun a ni.
Lawng kawng zim tak kaltlang hi an tlem hle tawh a, khawvela tuialhthei leh liquefied natural gas phurh hmun ngaa thena hmun khat vel kalna niin khawvel eibar zawnna a nghawng na hle.
Trump-a thuchhuah thar hian chawlhkar hnih awh tur inkahhai derthawng tak an kalpui mek dinhmun engtin nge a khawih dan tih ngaihvenna a tam phah.
Palai hna thawktute chuan lehlam lehlam hi indawrna ngai pawimawha indonaa kir leh tawh lo turin an ngen.
Oman Foreign Minister Badr Albusaidi-a chuan Pathianni khan social media-ah, “Inkahhai hi pawhsei a, inbe chhunzawm turin ka ngen a ni,” a ti a. “Hlawhtlinna atan hian inhnuhhniamna hrehawm tak pawh siam a ngai mai thei a; mahse, hei hi hlawhchhamna leh indona hrehawmna nen khaikhin chuan engmah a ni lo,” a ti bawk.
Iran hian tun hnaia US-in a indo lawng pahnihin strait-a chilpuah bomb kal thianin an paltlang nia a sawi chu a dik lo tih sawiin sipai lawng eng pawhin hetiang hi tih an tum chuan ‘na taka chhan let’ an nih tur thu a sawi a. Trump-a chuan a social media-ah Iran-in tuipui a thununna chu ‘khawvel sum chhuh luihna’ tia sawiin Iranian sipaiten US sipaite emaw, ‘buaina siam lo lawng’ emaw an kah chuan ‘PHIN DARH NGHAL TUR’ tiin a sawi bawk.
Strait danah hian an hming sawi lan loh ‘ram dang’ pawh an tel dawn tih a sawi a, Iran chu strait khar a nih avanga hlawkna a hmuh a phalsak a ni dawn lo tih a sawi bawk a. Social media-ah hian US Navy chuan ‘khawvel tuipuia lawng zawng zawng, Iran hnena toll pe tawh zawng zawng’ chu an kal a khap dawn tih a sawi.
Pathianni tlaia Fox News-in a kawmnaah Trump-a chuan, “Iran hian an duhzawng mite hnena tuialhthei hralhna atanga sum an hmuh kan phal dawn lo,” a ti.
Iran hian indona a chhuah tirh atang khan strait-ah hian ama lawngte bakah ram dang tlem lawng a phalsak a. Iranian thuneitute chuan indona a zawh hnuah toll system siam dan tur pawh an sawiho tawh a, a hmangtute chuan an hnenah fee an pe dawn a ni.
Inremna a awm loh hnuah Trump-a’n Strait of Hormuz khar dawn
