Inrenchem sawimawi a, midang inrenchem lo sawiseltu ZPM sawrkar chu an inrenchem lo tih Congress Thalai chuan an sawi.
Congress Thalai Hqrs. thuchhuak chuan, Congress sawrkar kumtawp, 2018- 2019 a state leiba chu cheng vaibelchhe 7315 a ni a, a hma kum aia a punna vbch. 35 niin, a chang chuan leiba pung loin a tlahniam zawk tih a sawi. 2015-16 ah chuan a hma kum aiin vbch. 443 in leiba a tlahniam a. 2016- 17 ah vbch.170, 2017-18 ah vbch.420, 2018-19 ah sum puk ngai loin sawrkar a kal thei tawh tih a sawi.
MNF sawrkar hnu kum thum chhungin state leiba a pung zawt zawt a, 2022-23 ah phei chuan vbch. 12553 a ni hman a, MNF sawrkar hnua leiba punna chu 2022-23 thlengin vbch. 5238 niin, a punna hi zaa 58.27 a ni.
Inrenchem sawimawia inrenchemna a awm loh avang leh sum an hman thiam loh avangin ZPM sawrkar pawhin thla tin sum an puk tih Congress Thalai hian a sawi a. Council of ministers thukhawm chuan ZOHANDCO chairman Lalliansawta, ZIDCO chairman JK Dawngzuala, MIFCO chairman Lalthazuala Royte, MAMCO chairman Isaak Malsawma, MKVI chairman C Lalremliana, MYC chairman Malsawmzuala Ralte te chu thla tin lawmman Rs. 8000 atangin Rs. 40000 ah a tih pun sak dawrh tih a sawi.
Board chairman lawmman tihpun hma hian ZPM sawrkar chuan chief minister adviser tam ber term record a lo siam tawh a. Adviser to CM 5 staff-te hlawha mipui sum thla tin senral chu Rs. 15,272,65 a tling tih a sawi. Kum khatah Rs. 18,327,180 senral niin, kum 5 chhungin Rs 91,635,900 mipui sum senral a ni dawn tih a sawi a ni.
‘ZPM sawrkar hian pensioner-te hlawh pawh lak then sak an tum mek nia a lan laiin, Tualpui khuaah chief minister Pu Lalduhoma lim siamna atan cheng nuai 20 chuang senral a ni lawi si,’ thuchhuah chuan a ti.
Inrenchem sawimawitu inrenchem lo
