K.Hmingthankaia
Insawisak rawn tih ri hriat ringawt pawh hian thin a tiur a, a huatthlala em em bawk. Tin, insawisak rawn tih hrim hrim hi a thing lutuk tawh a, a zahthlak bawk.
Kei pawh, hmeichhe pakhat dawthei lutuk leh rilru chhe lutuk vangin pawl pakhatin an ‘run’ an office-ah min sawisak rawn tawh. Ka hneh emaw, hneh lo emaw, a mal emaw, a huho emaw pawha ka hlauh miah lohten, a huhoa nuam ti taka min khawih rawn phuba ka la duh miah lo leh, ka thinur miah lo chu ka tan a lo tha zawk daih a, an tan a tha ve kher em? ka hre lo.
Mi pawimawh emaw, pawimawhlo emaw, mahni mihringpuite chunga thianho emaw, Veng angin emaw, pawl angin emaw, khawlaiah emaw, inchhungah emaw insawisak rawn hrim hrim hi a hutthlala em em a, a tenawm hle a, dawihzep hna a ni. Thimthamah emaw, mi hnunglam atangin emaw, mi inring lo lai kut thlak chawrh nen a inang reng. Hetiang thil vel leh sawisak rawn tih vel hi ka tawng zing hle lehnghal. Thi paih pawhin vawihnih min paih tawh. |henkhat chu ka testimony angreng pakhatah khan ka ziak nghe nghe.
Tun hnaiah mi sawisak rawn ri ring tak chuan sawi a hlawh hle a, a khawih rawntute chawplehchilha baila chhuah nghal pawhin mi thenkhat mak tih a hlawh hle bawk.
Dan hre lo mimawl ka nih angin zawhna mawl ka’n zawt teh ang. A tuartu tana na tak leh thinurthlak tak insawisak rawn, nunrawnthlak tak ni bawk hi rang taka in bail theih case a lo ni reng a ni maw? Chuti a nih chuan a tuartu tan, dan leh roreltu chungah rilru a va na duh dawn ve. |henkhat, mi rilru dam deuh nana nikhat pawh jaila lut lova, thenkhat rei tak tak jail an tang si hi eng nge a awmzia? Bail an dil ve loh vang nge, Police-in case an ziah luh dan azir zel zawk? Nge, a mihring azir zawk? Bail theih case nazawng hi chutin an bail theih nghal zung zung kher em ni? |henkhat rei tak tak an buaipui si hi a va mak ve.
Dan reng reng hi roreltuten dan bawhchhe lutuk si lovin, an duh dan danin an pawtsawi thei tih chu kan mit hmuh leh beng hriatah a lo lang fo tawh. Mahse, roreltu tha leh fing chuan, thutlukna a siam dawnin, a tuartu leh mipuia nghawng a neih dan azirin uluk tak leh fimkhur takin thil a ti thin. Tun tuma rorelna thutlukna hian, dan leh roreltu leh sawrkar chungah mipuite hian thlamuanna leh rinna an nghah ngam loh phahin, roreltute leh dan reng reng hi rin ngam leh innghahnatlak leh thlamuanpuitlakah an ngaih loh phah mai lo’ng maw? Chu chu roreltu awmchhan leh, dan leh dan awmchhan a ni lo a ni lawm ni? Dan thuhmun hnuaiah rau rau hian mi rethei leh mi hnuaihnungte hi, dan leh roreltute-ah hian kan thla a muang ve thei lo zawng a nih hi le…