Nimin chhun khan Agriculture Minister, P.C. Vanlalruata’n a office chamber-ah Zofate insuihkhawmna hla, Rosangliana (Zo Rock) phuah leh sak “Luang hum hum” tih music video leh Zofa Global Network (ZGN) YouTube channel a tlangzarh.
Tlangzarhna-ah hian P.C. Vanlalruata, Minister leh Zofa Global Network Adviser ni bawk chuan thu sawiin, “Zofa Global Network hmalakna-in Zofate tana mi hlu Pu Rosangliana (Zo Rock)-in Zofate insuihkhawmna hla thar a rawn chhawpchhuak leh ta hi a lawmawm ka ti hle mai,” tiin thu leh hla hmanga hnam insuihkhawmna lama sulhnu nei thate an hlut thu a sawi a, “Keini ho hi mual kan la liam zel dawn a, chumi hunah pawh heng thu leh hlate hi a ral ve dawn lo a, Zofate phuarkhawmtu a ni zel dawn a, a hlu em em a ni. Zofate insuihkhawmna tura Zofa Global Network YouTube Channel siam a ni hi Zofate suihkhawmtu a nih ngei ka beisei,” a ti bawk.
Tlangzarh inkhawm hi Zofa Global Network President C. Lalrambuatsaiha’n a kaihruai a. KL Vanlalruali, Central Committee Member, Zofa Global Network-in hunserh hmangin James Ramdinmawia, General Secretary, Zofa Global Network chuan music video leh Youtube Channel thlirlawkna a nei a. Zofa Global Network Vice President pahnih, C. Dinthanga leh Lalbuta ten thusawiin, “Luang hum hum” phuahtu leh satu ni bawk, Rosangliana (Zo Rock), Central Committee Member, Zofa Global Network-in lawmthu a sawi a ni.
Insuihkhawmna hla Zorock ‘Luang Hum Hum music video tlangzarh
