Isaac Zoliana
Ph : 9436351567
Mizoram thil hlui vawn that chungchangah hian, INTACH hi an chhuanawm hle mai. Pu Buanga Dictionary-a tel tur tel lo leh a in leitu la vawn that chu a thih veleh la thei turin, inkar reng se a tha hle a ni.
Pu Buanga Dictionary, hi Forward atangin, Pu Buangan Introduction preface I leh II ka zir phei zel a. Hmanhmawh miah lovin ka zir chhuak dap a. Pu Buanga kha a fakawm hle mai tih ka zir chhuak a. A thiam patawpin a la khawm a. Mizo tawng thumal tam tak a awmzia a hriat loh, Thangchhunga a zawh nasatzia te leh, mi dang dang pawhin an pui bawk tih kan hria a. Bawngthah khua Hrangtea pawhin Pu Buanga a puih thin thu min hrilh. Kum rei lo te Mizorama an awm chhunga Mizo tawng kan tih tak ber, Lusei tawng thumal heti zat a la khawm hman hian a thawh nasatzia a ti lang chiang hle a ni. Lusei tawngah hian thumal 3220 vel awma chhut chhuah a ni a. English-ho hian an tawngah hian thumal maktaduai khat a awmin an hria, kan inthlau hle. Mahse, tawng hi a piang thar zel a, kan hman thenkhat hi chu an thi zel bawk a. Hnamchawm tih te, zalen tih te, ramhual te, buhchhun tih leh a dang dang pawh hriat loh an ngah. A hman hun lai, British sawrkarin min awp lai chuan Lal kan nei a. Chung hun laia kan tawng thumal eng emaw zat chu an thi tawh. Kan hmang ngai tawh lo. Tun lai nula tlangval zingah chuan, nula va ‘bem’ te, va ‘khruench’ chu tawngkam lar ru tak a ni a. Upa deuh chuan kan hriatpui lo. Tiang hian tawng chu a piang zel.
Pu Buanga Dictionary hi amah leh hnam dang, Mizo tawng zir duhte chuan zir tur lehkhabu kan neih chhun a ni a. A pawimawh hle.
Mizo tawng, Duhlian tawng, Lusei tawng hi a kal sual dan leh a kal sual tanna hi kum eng emaw zat ka chhui ka chhui a. Pu Buanga Dictionary, kum 1975-a an chhut thar hi preface atangin Introduction ka zir phei zel a. Hmanhmawh miah lovin tlar tin ka zir chhuak parh a. Pu Buangan Mizo tawng kan tih tak ber, Lusei tawng, sap tawnga a hrilhfiah hi dik lo a lo tam em em a. Sap-ho leh hnam dang, Mizo tawng zir duhtu chuan Pu Buanga Dictionary lo chu Mizo tawng zirna tur lehkhabu kan nei si lo va. A hrilhfiah dik leh dik loh chu, dik veng angin an zir ta a. Kan Missionary saphote, Zosapthara, Zosaphluia te leh an hnu-a lo chhuak zel te pawhin Mizo tawng zir nan ber an rawn hmang zel a. Anmahni Bible leh Hla te Mizo tawngin min lehlinsak tan ta a. Zosaphluian Bible leh Hla lehlin leh Hla phuah te a chhunzawm a. Khasi Kristian, Sinibori te, Rai Bhajur te, Raja Singh te, Sahon Roy te, Simeon Rynjah leh a dangte pawhin hla phuah leh saptawng leh Khasi tawng atang te pawhin hla min lehlinsak ta zel a. A lawmawm hle mai.
Mah se, Mizo ni lo na na na chuan Mizo tawng bulbal leh a kal phung hre kim hek lo. Ni-a an hriat dan dan khan Mizo tawng an zir chu an hmang ta a. A dik leh dik lo chu dik vek angin an hman pawlh ta vek a. Kan Bible leh Hla-ah te chuan a dik leh dik lo chu a inpawlh ta chuat mai a. Kan ni tin Skul zirlai berte pawh Missionary Sap-ho min siamsak vek kha Primary School-ah kan zir ta bawk a. Sap tih apiang chu dik lo thei lo, infallible-ah kan ngai nghet bur a, kan ngaisang lutuk a. Rev. Dr. Zaireman sapho kan ngaihsanzia a sawi dan chuan Mizo tawng an tawng pai anga tawng pai ve turah tam tak chuan an ngai a. An tawng pai ve nual hmanin a sawi. A chhan chu Missionary School zirlai bu-ah khan–
Mingo an huai ber a,
Mingo an chak ber a,
Mizo an fing ber a,
Mizovin Lal chi bik an nei lo, tih te kha an ziak a. Mizo naupang zawng zawngin kan zir vek a. Kan thluak an su hneh em a ni. Kan hlauh va, kan ngaihsan theih nan kan zirlai bu-ah Lal ngaihsan loh, anmahni ngaihsan min tuhsak a ni. Sap-in thil an tisual thei lo a ni mai. Mizo tawng bulbal leh kalphung an hre kim si lo va. Ni-a an hriat dan ang ang khan Mizo tawng chu an hmang a. Dik lo a tam ta reng a. Mah se, kum 100 kan lo hmang tawh a. A dik vek emaw kan ti mai a ni.
My Saviour tih pawh hi ka Chhandamtu, tiin min lehlinsak a. Kum 100 zet kan lo hmang tawh a. A dikin kan hre tlat tawh. My saviour chu mi Chhandamtu, tih tur a ni si. My Redeemer – Ka tlantu, min tihsak pawh kum za nufa kan lo sak tawh chu kan rilru-ah a bet nghet tawh hle. Mah se, saphovin kan rilru an sal-beh hi tlansan a ngai tawh, mi tlantu, tihna a ni si.
Pu Buanga Dictionary-a Mizo tawng a hrilhfiah dik loh zawng zawng ti dik tur hian tu nge hma la dawn? tiin, a chhuahtu Asiatic Society General Secretary, Calcutta-a mi chu March ni 21th 2023 khan lehkha ka zuk thawn a. A dik lo tih dik hi tu zawk nge hma la dawn? tiin ka zuk ziak a. A copy hi Art and Culture Minister leh Art and Culture Director, Mizoram, ka pe bawk a.
June ni 14, 2023 khan Senior Research Officer, Tribal Research Institute, Mizoram sawrkar chuan, Pu Buanga Dictionary-a a dik lo zawng zawng tih dik vek an tum tawh tih leh, tih dik vek a nih hnuah chauh chhuttir leh an tum thu leh, ka chunga an lawmthu te min rawn hrilh a. A thlamuanthlak ta. An chungah hian ka lawm tak zet a ni.
Pu Buangan Mizo tawng a hrilfiah dik loh tam tak zinga mi pahnih khat i lo en teh ang –
têi = pro. myself, theyself, yourself, himself, herself, itself, ourselves, yourselves, themselves.
chi seh = v. to eat salt, to eat salt with one’s food, to give salt for
household use, salt, salt for househould use.
Dictionary phek tinah hian a dik lo a awm, ti ila chu kan sawi uar deuh a ni mai thei. Hmanhmawh miah lovin han zir chhuak ve vek teh. Missionary sapho khan Mizo tawng panga, awmze nei miah lo an phuahchawp, an hman rim em em, kan Bible leh kan Hla-ah pawh kum 100 chuang kan lo hman tawh chu hengte hi an ni– fo thin, zel fo, zel thin, reng fo, reng thin.
1. Mizo tawngah chuan, ‘fo’ leh ‘thin’ te hi hman kawp a thiang lo.
2. ‘zel’ -a ‘fo’ leh ‘thin’ an belh hian ‘zel’ awmzia an that.
3. ‘reng’ hmanga ‘fo’ leh ‘thin’ hian ‘reng’ awmzia an rin bo.
Bible-a ‘thin’ leh ‘fo’ zawng zawng leh kan Hla-a ‘fo’ leh ‘thin’ zawng zawng hi zaa sawmkuapakua (99%) paih ila, Pathian hi Chatuan mi a nihzia, a danglam ngai lohzia kan Bible hian a puang chhuak kim thei chauh vang. Always hi ‘fo’ ti-a Bible lettuten an hmang hi pawi tak a ni, pawi tak. Tawk rih teh se.