Inter Branch YMA Football Tournament
A khelh hun chungchangah felhlel a awm em ?!
Central YMA leh Mizoram Football Association thawkdun huaihawt LBS SUZUKI 21st Inter-Branch YMA Football Tournament – 2023 khuhhawnna chu May ni 16, 2023 (Thawhlehni) khan Vanapa Hall-ah buatsaih niin, LBS Suzuki hotupa Ngurdingliana’n a pet hawng.
Mizorama football tournament ngaihhlut hlawh ber tia sawi ngam, Mizo World Cup ti hiala sawi hlawh kumkhua Inter Branch Football Tournament hi season tawp lama khelh thin niin, Indian domestic league (ISL, I-League etc.) khel Mizo player-te chawlh hmanlai a nih thin avangin kan kawtkaiah Mizo star player rual hmuh tur an awm thin a, chu chuan tournament a tihlu zual niin a lang.
Chutih laiin Inter-Branch Football Tournament hi MFA calendar-ah tar-lan a ni lo a, MFA calendar thlir chunga calendar duangchhuak thin district football association (DFA) thenkhatin YMA tournament khelh hun lai hi sea-son ending tournament atan calendar-ah an dah a, chu laiah chuan insubuai thei awmin a lang.
DFA harsatna tawh chu…
He mi chungchangah hian DFA pakhat joint secretary Jonathan Boy-tloong chuan, “MFA calendar-a kan hmuh angin MFA hian YMA tourney hi calendar-ah a telh lo a, DFA-in season kharna tournament khelh hun atan April/May hi kan ruahman thin a, hemi a nih avang hian kan registered player reng reng club phalna lo chuan tournament dang va khelh kan rem ti lo.
“Kan division registered player hoin YMA football hi va khel nual se, helaiah club thenkhat chuan kan season ending tournament hi an khel thei dawn lo a; YMA football khel tur branch (khaw) pahnih hi kan (DFA) huam chhunga awm niin, pakhat phei hi chu kan first division club an ni a, season ending hi an khel lo a nih chuan kan hrem ang,” a ti.
State pawn thleng huap zo YMA branch inelna chu an ngaipawimawh lo bik a ni lo tih sawi chungin ruahmanna fuh tawk lo a awm theih thu DFA hruaitu hian tarlang telin, “MFA-in a ruahman lawk loh, calendar-a a telh loh tournament lian a buatsaih hi DFA tan chuan a luhaithlak duh hle mai a, a chhan chu MFA calendar-ah May hi thla awl a nih avangin DFA-in season ending tournament khelhna hun atan kan lo ruahman tawh a, tun hnuah chuan DFA calendar hi inzahsak a tha viauin ka hria.
“Kan player thate hian va khel se tih hi kan duh, an tan pawh a tha tih kan hria, mahse, season ending nawi deuha khelh kha kan duh bik lo a; chumi piah lamah MFA-in DFA min tham lo deuh nia kan hriat avangin player-te pawh anmahni thua va khelh ngawt hi kan khap ve ngat a ni,” tiin an inkhaikhawmna leh an ngaihchan ber MFA lam ruahmanna fel tawk lo awm thei a sawichhuak.
Harsatna awm thei sutkian dan tur nia a ngaih DFA hruaitu hian tarlang telin, “DFA tinin MFA calendar enmil chungin calendar kan ruahman thin tih an hre vek a, MFA lam hian DFA-te chu MFA-a an calendar submit turin ti se kan buaina hi fel mai thei tur a nih laiin an ti si lo!
“Tournament an siam dawnin DFA-te ruahmanna lo neih ve dante min enpui thei ta se; tin, April/May hi DFA lamin season ending khelhna’n kan hmang thin tih pawh hre tura ngaih an ni hrim hrim a, Central YMA nen indawra tourna-ment an siam dawnin DFA lam har-satna awm thei thlirpui chungin kan ruahmanna neihte min zahsak ve se tih hi kan ngenna a ni,” a ti.
MFA-in engnge an sawi?
Hemi chungchangah hian MFA honorary secretary Lalnghinglova Hmar chuan Post Sport hnenah DFA lamin harsatna an tawh thu ziakin an la dawng ngai lo tih a sawi a, YMA football khelh hun chungchangah, “YMA hian season tirah min dawr lo a, season tirah calendar lama dah ngaihna a awm lo a ni.
“Season tawp dawn awl remchang hi YMA lam hian an chuh thin a, tun ang hun chho hi YMA football khelh hun a nia, player haw kim lai an chuh ve a ni,” a ti.
CYMA lam thukhawchang
Post Sport-in a biakpawh dang Organising Committee chairman R. Lalrinmawia chuan YMA football khelh hun chungchangah anmahni lamin ngaihdan leh duhdan an neih a rem chiah loh thu leh an thawhpui MFA kuta an innghah mai thu a sawi.
Marina hian YMA tournament hnuhnung ber aia kumina team/branch chhuak an tlem loh thu leh a inangkhat tlang nia a hriat thu a tarlang tel.
Kumin tournament…
He tournament-ah hian YMA branch hrang hrang 145 an inel dawn a, May ni 18, Ningani atangin Aizawl leh a chhehvela khelmual paruk – RG Stadium, AR Lammual, MAP Ground (Armed Veng), Muallungthu Ground, MFA Ground (Sairang Dinthar) leh Lengpui Ground-ahte khelh a ni ang. YMA branch football thiam ber nih inchuhin YMA member 3,600 chuang an innuai leh dawn.
A khuhhawnna hi LPS anouncer Nunui chuan hneh takin a kaihruai a, branch tin hruaitute bakah player-te leh sawmbikte an kal thahnem hle. Hriatrengi Lilac leh T. Vanlalhmangaihite’n zaiin kalkhawmte an awi.
Central YMA asistant secretary Prof. Malsawmliana’n Bible (Philippi 3:14) a chhiar a, tawngtaiin hun a hawng.
CYMA vice president Lalhma-chhuana’n Inter Branch Football hlawh-tlinna tura sum leh pai ngaih thu sawi chungin mi inphalte inpekna a fak a, veng leh khaw hrang hranga hruaitute thawhrimna lawmawm a tihzia leh thawhhona tel lo chuan hmasawnna a awm thei lo angin thawhhopui tur tha tak an awm avanga lawmawm a tihzia a tarlang tel.
MFA Ambassador S. Malsawm-tluanga’n team tin captain leh team aiawh-te an awmna hmunah dintirin, tournament khelh chhunga dan zawm a, khelmuala mawitaka khel turin thutiam a lakpui.
Central YMA president R. Lal-ngheta’n branch tin hruaitute rinawm a tulzia hrilhin, tournament-ah mahni member ni lo lak ruk tum awm thin chu bansan tura sawmin, YMA taka tour-nament hmachhawn turin thuchah a sawi.
MFA honorary secretary Lalnghing-lova Hmar pawhin CYMA leh MFA thawhho theih avanga lawmawm a tih thu sawiin, footballer hlawhtlingte bultanna chu CYMA football tournamnet a nih fo thin thu a sawi a, kuminah pawh player tha tak tak rawn chhuak leh dawn niawma sawi chungin player-te chu theihtawp chhuah turin a fuih a, tangkai taka CYMA inter branch football tournament hmang turin player-te a chah.
LBS Suzuki aiawh Ngurdingliana chuan CYMA leh MFA-te nen thawkho theia an awm lawmawm a tihzia sawiin, hun dangah pawh thalaite’n sport lama hma an sawn theihna a nih dawn phawt chuan an inhawng zel dawn tih a sawi.
Organising Committee chairman R. Lalrinmawia chuan team 145 chhuakte chu group pariat (A-H)-a then a nih thu leh uluk taka fixture siam a nih thu sawi chungin fixture a tlangzarh a, tournament khel tur veng leh khua zawng zawng duhsakna a hlan nghal.
Champion lai Chanmari
Kum 2019 kha Inter-Branch Football Tournament khelh hnuhnunber niin, Chanmari (Aizawl) chuan final-ah 4-1-a vawinga champion tling awmchhun Armed Veng hnehin trophy an hawn.
Kum li kalta final-ah khan Chanmari tan Lalrinchhana Tochhawng, Lalhriat-renga leh Jerry Mawihmingthangate’n goal khat theuh thawhin, Armed Veng player Saidingliana ‘own goal’ hmuh tur a awm bawk.
Armed Veng goal neihchhun kha Lalbiakhlua tihluh a ni thung.
Chanmari khan semi-final pakhat zawkah Hnahthial Joint YMA hma-chhawnin, hun pangngaia goal a luh zawh loh hnu penalty petah 4-1-in an vannei a; last four inkhel danga Armed Veng leh Bethlehem Vengthlang intumah pawh hun pangngaiah goal a lut lo a, penalty petah 4-3-in Armed Veng an chak.
Kumin hian Hnahthial atangin team chhuak an awm lo a, Mizoram chhim lam atangin thleng sang tura beisei an awm leh dawn em hriat theih a ni rih lo!
Suzuki Gixxer 250 20th Inter-branch YMA Football Tournament 2019-ah khan best goalkeeper atan Chanmari goal-veng MS Dawngliana thlan niin, tournament chhunga goal li thun tling awmchhun Lalfakzuala (Armed Veng) chu top scorer a ni a; tournament best player atana thlanchhuah Chanamri thiampuipa Rochhingpuia chuan Suzuki Access scooty a khalh haw.
YMA football history
Mizorama football inelna ropui berte zinga pakhat Inter Branch YMA Football Tournament hi kum 1985 atanga khelh tan niin, champion hmasa ber Armed Veng chu champion ngun ber an ni nghal bawk.
Runner up vawikhat ni tawh bawk Lengpui chu Aizawl khawpui pawn atanga champion thei branch awmchhun an la ni. Aizawl Electric Veng vawithum an champion ve tawh bawk.
Tournament khelh tan kum 1985 khan branch 32 chhuakin, kum 1990-ah team chhuakin 50 an pel a, branch 68 an inel.
Kum 2003 kha team chhuak (101)-in 100 an tlin tanna niin, a hnu lam zawng, kumin thlengin branch tel hi za chuang an ni chho ta ziah a; kum 2015 khan team tel an tam ber a, branch 191 atangin football team an inlan.
Inter Branch YMA Football Tournament A khelh hun chungchangah felhlel a awm em ?!
![](https://theaizawlpost.org/wp-content/uploads/2023/05/tourn.jpg)