Nilaini zan khan Fifa Club World Cup 2025 khelh chhunzawm a ni a, European club lian Inter Milan leh Borussia Dortmund ten hnehna changin knock out round an paltlang a, last 16 an lut zui ve leh. Inelna neih mek hi tukin zing lam khan group stage khelh zawh a ni a, last 16 lut tur an inching fel kim chiah.
Khelh hnih atanga point li hmu a, Group E hmahruaitu ni mek Inter Milan hian Lumen Field-ah Argentina club lian River Plate an hmachhawn. River Plate lakah hian si hnih faiin hnehna an chang a, group champion ni chungin last 16 an lut.
Inkhel hmuhnawm takah hian goal lut a awm thei lawk lova, goal thun tumin an innawr tawn nasa hle. Last 16 lut thei tura chak mamawh River Plate in chak tum viau mah se chesual zawkah an tang a, minute 66-naah Lucas Martínez Quarta hnawhchhuah a ni. Chak mamawh tak chunga kim lo zawk an ni hi an tuar zui hle a, goal pawh an chhuah ta thuai. Tam zawk an nih vanga phur hluai Inter Milan tan hian Francesco Esposito chuan minute 72-naah hmahruaina goal a thun. Tam zawk leh goal thun hmasa zawk an nih vangin Italian club lian Inter Milan dinhmun a tha viau tawh.
Champions League final-a mualpho Inter Milan hian goal thun belh ngei tumin tan an khawh zui nasa hle a. Hun pangngaiah goal thun belh thei lo mah se hun pek belhah an vannei nawn leh a, goal an thun belh leh. Inter Milan tan hian Alessandro Bastoni chuan minute 90’+3-naah an goal hnihna a thun a, an hmahruaina tizauin, an chakna a nem nghet. Tlawm pumpelh thei tura goal thun mamawh River Plate an vanduai nawn leh a, hun tawp dawn hnaih minute 90+6-ah Gonzalo Montiel hnawhchhuah a ni zui leh. Last 16 lut thei turin chak mamawh viau mah se River Plate hi Inter Milan ngam lovin an tlawm a, Fifa Club World Cup 2025 atangin an puanthuah an tel zui ta a ni. River Plate hian an game hmasa pahnih atangin point li an hmu tawh a, last 16 an hnaih hman viau laiin an tla ta si a, tling thelh apiang pawi tih zualin, an ui vawng vawng ngei ang.
Group D-a inkhel dangah Monterrey chuan dang 4-0 ngawtin an khingpui Urawa Red Diamonds an sawp a, last 16 an lut ve bawk.
Point hnih hmu tawh a, last 16 lut thei tura chak ngei ngei mamawh Monterrey hian Urawa Red Diamonds laka goal thun hma thei bik lo mah se chawlhlawk hmain goal thum ngawt an thun a, chawlhlawk hnu lamah goal khat an thun zui leh bawk. Inkhel hmuhnawm tak hi darkar chanve an khel tling chiah tihah Nelson Deossa chuan Monterrey hmahruaina goal a thun.
Hmahruaina goal an thun hnuin an phur thar zui viau a, goal dang pawh an thun belh leh thuai. Hmahruaina goal an thun atanga minute lina lekah Germán Berterame chuan an goal hnihna a thun belh a, an hmahruaina a tizau. 2-0 a hma an hruai hnu hian Jesús Corona chuan minute 39-naah an goal thumna a thun belh zui leh zat. Minute 9 chhung leka goal thum an thun hmangin, si thum faia hmahruai chungin chawlhlawk an hmang.
Chawlhlawk hnu lamah Monterrey an khel tha chhunzawm a, goal luh belh thei lawk lo mah se a tawp an khar tha a, hun pek belhah an goal lina an thun. Monterrey goal lina hi minute 90+7-a Germán Berterame thun a ni. Hnehna pawimawh tak an chan vangin Monterrey hia River Plate chu point khatin an lehpel chiah chiah a, last 16 an lut.
Group E-ah hian Point 7 hmuin Inter Milan chu group champion an ni a. An khelh hnuhnung berah hnehna an chan nawlh vangin Monterrey in point 5 an hmu a, point khata Riverplate lehpel chiah chiahin last 16 an lut a. River Plate leh Urawa Red Diamonds te last 16 lut zo lovin an tla.
Group E champion Inter Milan hian Brazil club lian Fluminense an hmachhawn zui leh dawn a, Fluminense lakah fimkhur a ngai khawp ang. Fifa Club World Cup 2025-ah hian European club leh Brazil club te an chetha viau a, Europe club leh Brazil club te inelna a ni deuh hawt mai. Group E-a pahnihna Monterrey hian Borussia Dortmund an hmachhawn zui leh dawn a, fiahna hautak tak an hmachhawn zui dawn tihna a ni.
Group E a mite an inchinfel zan hian si khat faia Ulsan HD hnehtu Borussia Dortmund chuan group champion ni chungin last 16 an lut. Ulsan HD laka Dortmund an chak laiin hmahruai mektu Flumines an chak zo lo ve thung a, Brazil club lian hian an hmahruaina an hloh phah ta hial a ni.
Group champion ni thei tura chak mamawh Borussia Dortmund hian group champion ni thei tura chak mamawh tak chungin TQL Stadium, Cincinnati-ah an hmachhawn. Vawi hnih tlawm zawn a, tla chiang tawh Ulsan HD lakah hian Daniel Svensson chuan minute 36-naah goal pawimawh tak a thun a, si khat faia hmahruai chungin chawlhlawk an hmang.
Chawlhlawk hnu lamah inkhel hmuhnawm in, Borussia Dortmund hlauhawm zui viau mah se, hu tawp thlengin goal dang a luh belh thei tawh lova, Borussia Dortmund in hnehna pawimawh tak changin point thum an hmuh belh.
Group F-a an elpui lian Borussia Dortmund an chak laiin Brazil club Flumines chu last 16 lut thei dinhmuna ding Mamelodi Sundowns lakah an chak zo lova, inkhel hmuhnawm takah goal awm lovin an inhnehtawk. Flumines an chak zawh loh vangin point 7 hmutu Borussia Dortmund chu group champion an ni a, point 5 hmuin Flumines in an dawp a. Point li hmu chungin Mamelodi Sundowns an tla a. Mamelodi Sundowns rual hian khelh thum atanga point hmu miah lo chungin Ulsan HD in an puanthuah an tel fel ve nghal bawk.
Inter leh Dortmund an tlang ve leh
