Pathianni zing lam khan MLS conference final khelh a ni a, Eastern Conference champion Inter Miami in final an lut. Messi khelhna Inter Miami hian final-ah Western Conference champion Vancouver Whitecaps an hmachhawn ang.
Eastern Conference final-ah Inter Miami hian New York City FC an hmachhawn a, Chase Stadium-a inkhel hmuhnawm takah 5-1 ngawta hnehna changin phu takin an champion. Inter tan hian Tadeo Allende chuan hattrick a siam a, minute 14, 23 leh 89-naah te goal a thun. Allende goal thum thun bakah hian Mateo Silvetti leh Telasco Segovia ten goal khat ve ve an thun a, New York City tan Justin Haak chuan goal khat thun bawk mah se result a khawih danglam phak lo. Inter Miami hian hnehna pawimawh tak an chang a, tui let hnua a vawi khat nan MLS Cup final an lut.
New York City FC laka Mateo Silvetti goal thun hi Lionel Messi siam a ni a, player ropui bik Messi hian assist nei hnem ber record thar a siam. Messi hian assist vawi 405 nei tling chiahin Puskas (404) record a khum chiah a, Pele record (369) a tlansan thui zel bawk. Ballon d’Or vawi riat ngawt dawng tawh Messi hian tun hnai mai khan goal contribution ngah ber record a lo siam tawh bawk. MLS Cup final an luh theih nan pawh Messi hian a thawhhlawk hle a, goal ruk thunin assist vawi sarih ngawt a nei a, MLS play-off ah goal contribution ngah ber a ni tel bawk.
Eastern Conference-ah Inter Miami an champion laiin Western Conference lamah Vancouver Whitecaps chuan an khingpui San Diego FC chu 3-1 in an hneh a, Inter Miami hmachhawn turin final an lut ve bawk.
German player ropui Thomas Muller enkawl Vancouver Whitecaps hian chawlhlawk hmain goal thum an thun hman a, Brian White chuan goal hnih a thun a, an khingpui player Pablo Sisniega chuan an lamah ti-goal in goal khat a thawhsak ve bawk.
MLS Cup final-a intum tur Inter Miami leh Vancouver Whitecaps te hi 2025 Concacaf Champions Cup semi-final-ah an lo inhmachhawn tawh a. Hemi tum hian Whitecaps hian si belhkhawmah 5-1 ngawtin hnehna an lo chang tawh. MLS Cup final-ah an intum leh dawn a ni a, Messi khelhna Inter Miami hian hnehna chang letin phuba lak ngei an tum hle ngei ang.
Inter Miami in final an lut
