May 10, Nilai zan khan UEFA Champions League semi-final khelh chhunzawm a ni a. Milan derby-ah Inter Milan chuan si hnih faiin mualneitu AC Milan an hneh a, final luh an hnaih leh zual. AC Milan hian second leg-ah inlehthalna lian thlentir an tum dawn a, kar leh thawhleh zanah hnehna changin, final luh ngei an tum ang.
Giuseppe Meazza a lenglut Inter Milan hian an elpui lian AC Milan lakah bul an tan tha tak zet a, minute 11 chhung lekin goal hnih an thun hman der. Chawlhlawk hmain goal thun theihna hun tha dang nei mah se an chhawr tangkai zo lova, penalty an hmuh tawh pawh VAR hmangin sutsak an ni. Chawlhlawk hnu lamah pawh Inter hi hlauhawm zawkah an tang tluan a. Si hnih faia chak an phu mai a ni lova, goal thum tal an thun loh vangin an vanduai a tih theih zawk nghe nghe a ni.
Inter Milan hian minute 8-naah corner an hmu a. Çalhanoglu corner pet tha tak chu veteran forward Edin Dzeko chuan chiang zetin a hlap lut a, hmahruaina goal a thun.
Hma takah goal an thun hian inrintawkna sang zawk a pe a, na taka an khingpuite nawr chhun-zawmin, goal pawh an thun belh leh thuai. Minute 11-naah lekah Dimarco siamsak atangin Henrikh Mkhitaryan chuan tha zetin a pet goal a, an goal hnihna a thun. Arsenal leh Manchester United winger hlui Mkhitaryan hian hun tha dang nei mah se a chhawr tangkai zo tawh lo. Inter tan hian Hakan Calhanoglu chuan goal dang a thun belh zui leh teuh viau a, goal post a pet per dawp.
Inter Milan hian chawlhlawk hmain goal thun theihna hun tha an neih belh leh a, captain Laurato Martinez chuan uiawm takin a hun tha neih a chhawr tangkai zo lova, goal chungah a pet chhuak luah. Martinez vek hian box chhungah tha zeta ball a lak kawi hnuin penalty a hlawhchhak. Referee Jesus Gil Manzano chuan Inter Milan hi penalty a pe hman zet a. VAR rawn a nih hnuin a thutlukna a sut a, penalty pek an ni lova, AC Milan in goal an chhuah belh lo hlauh naa si hnih faia hmahruai chungin chawlhlawk an hmang tho thung.
Second half-ah AC Milan game a kang hret a, hlauhawm siam hma-sa zawkah an tang. Hlauhawm siam hmasa zawkah tang bawk mah se goal an chhuah belh teuh viau thung a. Goal hmahruai thuntu Edin Dzeko chuan pet goal ngei tura ngaih chu uiawm takin a hlah a, an hmahruaina a tizau thei lo. Dzeko-a’n a hun tha a hlah hnu lawk hian Milan pawhin goal post pet perin an hun tha neih an hlah ve bawk a. An mualah goal thun tur khawpuin an elpui lian Inter Milan tlarhnung an thiat thei lo. Tichuan, goal dang luh belh lovin inkhel a tawp a. Inter Milan chuan si hnih faiin hnehna an chang zui ta a ni.
Semi-final thawh khatnaah si hnih faia hnehna an chan vangin Inter Milan hian final an hnaih ta kuarh a. Final lut turin an mualah inhnehtawk emaw, si khat faia leka tlawm emaw chauh an mamawh tawh. An muala inlan zui tur an nih vangin final lut turin an dinhmun a tha viaua thung a. Final an lut a nih chuan kum 13 zet hnuah UEFA Champions League final an luh lehna hmasa ber a ni ang.
Si hnih faiin hmahruai tawh mahse Inter Milan manager leh player te an tawng fimkhur rih viau a. Second leg-ah inlehthalna thleng thei a nih thu an sawi hlawm. AC Milan laka hmahruaia goal thuntu Edin Dzeko chuan si hnih faiin hma hruai tawh mah se inkhel ala tawp lova, inlehthalna thleng thei a nih thu a sawi. “Team tha tak an ni a, anni hmachhawn hi chuan inthlahdah theih a nih lova, fim khur reng a ngai” a ti a. First leg anga thaa an khelh leh theih phawt chuan final an luh ngei a rin thu a sawi tel bawk. Inter manager Inzaghi pawhin inlehthalna la thleng thei a nih thu a sawi rualin an mualah mipui tam zawk tawiawmna nen hnehna changin, an mang phan ram a taka chantir in, final an khelh ngei a rin thu a sawi ve bawk.
Inter Milan in final an hnaih
