ThawhTan zan khan Fifa Club World Cup 2025 last 16 khelh chhunzawm a ni a, European club lian Inter Milan leh Manchester City te an mualpho va, quarter-final lut zo lovin an tla. Champions League finalist Inter Milan hi Brazil club Flumines hneh lovin an tlawm a. English club lian Manchester City chuan Saudi Arabia club Al-Hilal an hneh lo ringawt bawk.
Inter Milan 0-2 Flumines
Italian club lian Inter Milan hian Brazil club lian Flumines lakah rin an kai viau a, quarter-final lu ngei tura ngaih an ni. Chak tura rinkai zawk ni chiang viau mah se mak tak maiin goal an chhuah thuai a. An si phurh sut tumin Tan an khawh nasa viau a, goal thun theihna hun Tha pawh an nei. An hun Tha neih an hlah zel laiin an khingpui ten an hun Tha neih an chhawr Tangkai zui leh bawk nen inlehthalna lian a thleng ta a ni.
Brazil club Flumines hian European club lian Inter Milan-ah bul an Tan Tha viau a, inkhel Tan aTanga minute thumna lekah Germán Cano chuan hmahruaina goal a thun nghal. Hma takah goal an thun vangin Flumines an phur viau a, inrintawkna sang zawk nnen team lian Inter Milan lakah an inlan zui theih phah bawk.
Hma taka goal an chhuah hi sut ngei tumin Inter Milan in Tan an khawh a, goal thun theihna hun Tha pawh an nei. Captain Lautaro Martinez chuan a hun Tha neih hlahin an si phurh a sut thei lo phawt a. Federico Dimarco-a’n hun Tha tak a hlah leh hnuin Dutch defender Stefan de Vrij chuan an hun Tha ber ang hiala chhal theih chu a hlah leh tlat pek a, an vanduai a kaltluang rih hle.
Inter Milan in an hun Tha neih an hlah zel laiin Flumines in an hun Tha neih an chhawr Tangkai ve thung. Flumines hian hun pek belh minute 93-naah an goal hnihna an thun a, Hércules chuan an goal hnihna thunin, an hmahruaina a tizau. Hercules goal thun hnu hian goal dang a luh belh thei tawh lova, Inter Milan chu Flumines lakah si hnih faiin an tlawm a, Fifa Club World Cup aTanga tlain, an puanthuah an tel fel zui ta a ni.
Flumines laka an tlawm danah Inter Milan captain Lautaro Martinez a lawm hlo hle a, a khelhpui Thenkhatte chu inpekna nei thuk tawk lo niin a hria. Martinez hian captain a nih angin a theihna zawng zawng a hlan thu a sawi a, chu chu player tinte tih tur a nih thu a sawi a. Inpekna nei sang tawk lo, chak duha tuihal tawk lo te tan hmun a awm lova, chhuak duhte chu an mangTha tura an inpeih reng thu a sawi zui hial a ni.
Ranking-ah an chung daiha awm Inter Milan hneh a, Fifa Club World Cup quarter-final an lut thei hi Flumines tan thil ropui tak a ni a. An club chanchina hnehna an chan lian ber ni hiala ngaih zui a ni nghe nghe a ni.
Manchester City an mualpho
Flumines lakah Inter Milan an mualpho lai hian English club lian Manchester City chu Saudi Arabia club Al-Hilal hneh lovin an lo mualpho ve bawk. Al-Hilal lakah City an tlawm hi Inter Milan mualphona aia nasa zawka ngaih a ni.
Manchester City hian an hneh ngei tura ngaih Al-Hilal lakah bul an Tan Tha viau a, goal pawh an thun hma hle. Inkhel Tan aTanga minute 9-na lekah Bernardo Silva chuan hmahruaina goal a thun nghal. An hneh tura ngaih lakah hma taka goal an thun vangin City hian an khingpuite an sawp zui nek rinna lian tak a awm a, quarter-final lut ngei tura ngaih an ni tel bawk.
Goal thun hma viau mah se City in goal an thun belh thei mai lova, an hun Tha neih an hlah zel. Al-Hilal pawhin an si phurh an sut thei mai bik lova, 1-0 a hnufual chungin chawlhlawk an hmang.
Chawlhlawk hnu lamah inkhel hmuhnawm zawk hmuh tur a awm a, chawlhlawk hmang Tangkai Al-Hilal in goal an thun thuai. Second half Tan aTanga minute khat em pawh a liam hmain Marcos Leonardo chuan Al-Hal tan goal a thun a, an si phurh a sut. An si phurh an sut vangin an phur viau a, goal pawh an thun belh zui leh thuai. Al-Hilal tan hian Malcom chuan minute 52-naah hma an hruai letna goal a thun. Team lian City lakah goal an thun a ni mai lova, hma an hruai let ta hia Al-Hilal an hlim hle a, phurna namen lo tak nen an inlan ta chiah bawk.
Al-Hilal in hma an hruai let hi inkhel tihmuhnawm zualtu a ni a, City muhil an kaiharh chiah bawk. Season khar Tha lo tak City hian an si phurh sut ngei tumin thapui an thawh a, Erling Haaland chuan minute 55-naah goal thunin an si phurh a sut.
Second half tir lamah goal thum lut nghal Thawt mah se goal dang a luh belh har ta hle. Chak ngei tumin team hnihin Tan an khawh a, goal thun tumin an innawr tawn nasa hle. Goal thun tumin innawr tawn nasa viau mah se hun tawp thlengin goal dang a luh belh tawh lo. Hun pangngaiah chak zawk an awm theih loh vangin minute 30 dang an khelh belh leh a, minute 30 chhungin goal thum kan hmuh belh leh bawk.
Extratime-ah Saudi Arabia club lianin bul an Tan Tha a, goal an thun thuai. Extratime an khelh Tan aTanga minute lina lekah Kalidou Koulibaly chuan hma an hruai nawn lehna goal a thun a, Pep Guardio team a barakhaih nawn leh.
Si an phurh nawn leh hnuin City in an ze ngai an chhuah a, goal thun tumin an khingpuite an nawr zui nasa hle. Goal thun mamawh City tan hian Phl Foden chuan minute 104-naah goal thunin an si phurh a sut. Player leh coach nei Tha zawk City in goal an thun leh vangin English club lian hian hnehna changin, quarter-final an luh a rinawm nawn leh. An si phurh an sut vangin phur viau mah se City an phur rei lova, Al-Hilal in an barakhaih nawn leh ngat. Al-Hilal tan hian Marcos Leonardo chuan minute 112-naah hma an hruai nawn lehna goal a thun leh ta tlat.
City in an si phurh sut tumin Tan an khawh zui nasa hle a, an khingpuite an nawr bet hle. An khingpuite nawr tawmin, hlauhawm siam Thin bawk mah se goal an thun thei tawh lova, mak tak maiin Saudi Arabia club Al-hilal lakah an tlawm a, mualpho takin Fifa Club World Cup 2025 zing kawng an zawh tawp a, inelna lian aTanga tla felin, an puanthuah an tel fel zui ta a ni.
Manchester City hnawtchhuaktu Al-Hilal hi Group H-ah an awm a, rin phak bakin an cheTha. An match hmasa berah 1-1 in Real Madrid nen an inhnehtawk. Khawvela club hlawhtling ber Real Madrid nen an inhnehtawk ringawt pawh hi Al-Hilal tan result Tha tak a tling. Real Madrid nen an inhnehtawk hnuin RB Salzburg nen an inhnehtawk zui leh a, an match hnuhnung berah 2-0 a Pachuca hnehin last 16 an lut. Last 16-ah Manchester City hmachhawnin chugnung zawkah an Tang zui leh. Real Madrid nena inhnehtawk tawh an nih vangin Manchester City laka an chak hi thil mak a ni lo.
Al-Hilal hian Inter Milan hnehtu Flumines an hmachhawn zui leh dawn a, semi-final lut turin an inringtawk hle ngei ang.
