Inthlan a indawt chhoh zut dawn
vangin LC/VC inthlan a hma phah
– LAD minister
Inthlanpui buatsaih a hautak a, sawrkar kum tharah inthlanpui a indawt chhoh zut dawn avangin a hnai ber pahnih local council leh village council chu lakawpin inthlan hun pawh hnai a ni tih Local Administration Department minister C Lalsawivunga chuan a sawi.
Thawhtannia ZPM pary office-a inkhawmah minister C Lalsawivunga hian kum 2024-ah Mizoramin Cyclone Remal avangin chhiatna nasa tak kan tuar a, furpui a lo thlenin kawng hrang hrangah harsatna kan tawk thin a. Sawrkar kum tharah hian a lan danin, inthlan pawimawh tak tak pali hmachhawn tur a awm, tiin a sawi.
“August-ah village council, September-ah local council, November – December ah LADC, kum a lo thar anga, AMC inthlan a awm leh dawn. Inthlan hi a hautak em em a, sawrkar sum a kalral nasat thin avang leh mipuiin an tawrh loh theih dan ber tur ngaihtuahin sawrkar chuan inthlan hun a puang hma ta a ni. Kum 2020-ah pawh Covid vangin inthlan hun pawh tlai a lo ni tawh a, danin thuneihna min pekin angin tunah pawh kan ram dinhmun ngun taka ngaihtuah chungin inthlan hun kan puang ta a ni,” a ti.
Sawrkar laipui Finance Commission atanga grant hmuh a tlem tial tial avang leh inthlan hautak zet buatsaih a ngaih thin avangin mipui phurrit siam lohna atan leh an sum hmuh ang ang dik zawka kalpui a nih theihnan Mizoram sawrkar chuan LC/VC inthlan hun a puang a, chutihlaia High Court-a sawrkar khin a ni chu vanduaithlak a tih thu a sawi bawk.
Term tam tak sawrkara rorelna lo chelh tawhten kum khat leka upa sawrkar chu nasa takin a bei niin ZPM hruaitu hian a sawi. “Min khaikhin leh heti khawpa min beisei sang hi a lawmawm a. Kan intiam ang ngeiin eirukna thila hmingchhia kan la awm loa, sum kan renchem thiam a, a hmanna tur dik taka kan hman zel a pawimawh. Sum pawhpen leh a kalna tur ni loa kaltir hi kan chief minister duh loh ber niin, hma pawh a la ngam zel dawn a, a hnung zui turin keini pawhin theihtawp kan chhuah a ngai a ni,” a ti.
Inthlan a indawt chhoh zut dawn vangin LC/VC inthlan a hma phah – LAD minister
