Supreme Court lawyer leh activist Prashant Bhushan chuan Central sorkar chuan State panga inthlang mai turte inthlan hun sawn hlat nan “One nation, one election” (ONOE) kalpui an tum a ni tiin a sawi.
Madhya Pradesh, Rajasthan, Chhattisgarh, Telangana leh Mizoram te kumin kum tawp lama inthlang mai tur an ni a.
“ONOE hi India ram ang Parliamentary democracy-ah kalpui theih a ni lo, a chhan chu kan sorkar kal danah sorkarin majority hloha a tlu a nih chuan sorkar thar a insiam a ngai a ni,” tiin Bhushan chuan a sawi a.
Mahse ‘one nation, one election’ kalpui a nih chuan Presidential rule puanin a awm ang a, chu chu democracy kalh a ni, tiin a sawi a.
“Chumi awmzia chu democratic system atangin presidential rule system a luhna a ni ang. Chu tak chu parliamentary democracy bawhchhiatna a ni dawn a ni. Ka ngaihdan chuan hengte hi sorkar chuan a hre vek a, Presidential rule system a lut turin Constitution-ah amendment thahnem tak siam a ngai tih pawh an hria a ni,” tiin Bhushan chuan a sawi bawk.
Tuna sorkar hian Rajya Sabha-ah majority a nei lo va, chungte chu an hre chiang em em a ni. Tichung chuan one nation, one election tiin an tum ber chu kumin kum tawpa Madhya Pradesh, Rajasthan, Chhattisgarh, Telangana leh Mizoram election te hi postpone an tum a ni, tiin Bhushan chuan a sawi bawk.
“BJP sorkar hian heng State panga inthlang turah hian chak loh an hlau em em a. Hei vang hian ONOE hmangin kum 2024 inthlanpui hma chu Assembly poll te hi neih loh an duh a. Heng State ah te hian President Rule puan zui an tum ang,” tiin a sawi bawk.
Inthlan hun sawn sawn hlat nan ONOE kalpui tum
