Mizoramah MLA inthlanpui neih a nih dawn avangin ramri khar rih a ni dawn a. Pathianni khan Siaha district election officer, bawrhsap Lalhmunsanga Hnamte kaihhruaiin venhimna lam thawktuten hemi chungchang hi an thlirho.
DEO chuan inthlan felfai leh thianghlim nei turin venhimna lam thawktute chu theihtawp chhuah turin a chah a. A bikin Siaha district chu Myanmar nenaramri nei a nih avangin fimkhur a tul zual tih a sawi. International border leh inter-district a venhimna thawktute chu khauh zawka venhimna hna thawk turin a chah a ni.
Election Commission of India-in inkaihhruaina a siam (SOP for 72 Hours) angin, international border leh inter-district a venhimna thawktute chu vote thlak hma ni thum (P-3) atangin khauh taka venhimna kalpui turin a ti a. Assembly constitency huamchhunga lirthei lut leh chhuak ten ralthuam leh dan phal loh thil an phurh leh phurh loh endik turin a ti. Hei hian inthlan result puan ni thleng a huam dawn a ni.
International border-a venhim hna thawkte chu vote thlak ni hma ni thum atanga November 8 thleng international border chu uluk tak khar turin a ti a. Siaha leh Myanmar border venhim hna hi 20 Assam Rifles-in a thawk mek.
Siaha district-a venhimna uluk ngai bik (strategic point) Lobo, Phura leh Kaocho chu Mizoram Police-in venhim hna an kalpui dawn a. Ainak, Archhuang leh Nao-Aotlah te Assam Rifles-in an veng dawn a ni.
Inthlan vangin ramri khar
