Saitual Town Maxi Cab Service Association (STMSA) chuan Lok Sabha inthlan neih zawh taka, Saitual DC office nena lirthei an inhman sak dan chungchangah DC hian a hnuaia election vehicle incharge-te atangin thudik tawk lo a dawng nia an ngaih thu an sawi.
Tunhnaia Saitual bawrhsap-in thuthar thehdarhtute hmaa a sawi danah, MP inthlana an district-a maxi cab hmante chu an inrem dan thlapa lirthei hman man Rs. 6000 leh long run-a hman a nihin km khatah Rs.40 kal lam chauh bill thei tura inremna siampui anga ngaih theih tura a sawi chu hriatthiam harsa an tih thu an sawi. Long run-a kalte, kal lam emaw haw lam chauh bill thei tur hian inremna an siampui lo mai niloin, sawi pawh sawi ho a ni lo hrim hrim tih an sawi a ni.
Tun inthlanah an tlan zat kilometre dik tak, kal lam leh haw lam bill an la vek zawk a, an inrem dan chuan, polling party phur tur, inthlan hma leh inthlan nia an hmante chu ni khatah Rs 6000 a ni a, a bak chu ‘MLA Terms and Condition 2023’ ang kha, tih a ni, tih an sawi a. Hetianga thil diklo leh fel tawk lo awm nia lang chu a mawhphurtute chhuichhuak a, maxi cab an hman zawng zawng hian an hmanna man diktak an dawn vek theih nan thuneituten a rang thei ang bera hma laksak an duh hle tih an sawi.
Inthlana lirthei hman manah Bawrhsap sawi dan a dik lo – STMSA
