Inthlana senso tam chu corruption bul intanna nia an ngaih avangin sum hman tam chu an party chuan an do tih Congress president Lalsawta chuan a sawi.
Thawhtannia Lunglei Congress Bhawan-a hun a hmannaah Lalsawta chuan ram siamthat hmanhmawh thlak zia hria in, ram tan chauh politics dik khel a, tumahin politician khel lo turin a chah tih a sawi a. Party dangten an sum ngah inthlana chak nan hman an tum dawn a, an ni chuan inthlan senso tam chu corruption bul intanna leh a tihluartu nia an ngaih avangin sum hman tam an do tih a sawi.
Ram dinchhuah duh, Mizoram mipui nena an thawhho chuan hneh ngei an inring tih sawiin, party dangte anga sum tam tak hmanga campaign an tum loh avangin an party mipuiten an candidate-te phurrit siam zawng ni loa, an theih ang chin china mahni hekna tur pawha lo tanpui zawk turin a ngen tih a sawi. “Sum chakna hmanga rorelna chan tumte hi engmah ti thei loa siam kan tum a. Inthlan dawna midang chunga that chhuah thar thutte hnawl a tul a, inthlana sum chakna thah hi Congress thuthlung thar a ni,” a ti.
Inhlawhfa rilru pu loa a neitu rilru pu a, mahni ngei chu ram siamtha tu atana indahna rilru put a tul tih MPCC president hian a sawi a. Mipuiin sawrkar tha an an awt a, an nghahhlelh em avangin an au a. An party manifesto no.I chuan Mizoram mipui dinchhuahna tur ‘tang puihna’ a keng a, sawrkar laipui pawhin hetiang kawng hian hma a la nasa tih te a sawi. Mipui thawhrim leh taimak chu mimal leh hnam dinchhuahna a ni, tih zirtir chu politics kawng dik a ni, tiin, uar takin tlangaupui zel turin a chah.
Lunglei Municipal Council inthlan chu 2023 MLA inthlan atana semi-final a ni tih Congress hruaitu hian a sawi a. Lunglei mipui tana inenkawlna tha leh fel nei turin Congress party-in rorelna a chelh a ngai tih a sawi. 2023 MLA inthlanah Lunglei district huamchhung MLA bial 7 lak vek theih an inring tih a sawi bawk.