Inthlanah buaina thleng a awm lo – SEC
LC/VC 117-ah sawrkar siam awm rih lo
Mizoram district 9-a village council leh Municipal pahniha local council inthlanpui neih zawh takah party mala sawrkar siam thei an awm lohna LC/VC 117 a awm. State Election Commission Mizoram chuan he inthlanah hian khawi atang mahin buaina leh ralmuan lohna lam thleng report a dawng lo.
State election commissioner Dr H Lalthlangliana sawi danin, village council 554 leh local council 110 (February 14-a inthlang Lawipui LC tel loin) inthlanah khan ZPM chuan LC leh VC 321-ah sawrkarna a siam a; MNF-in 149 ah, Congress-in 57 ah an siam. Independent sawrkar siamna hmun 9 a awm bakah BJP sawrkar siamna hmun 1 a awm. Politicap party mal emaw independent hlangin emaw sawrkar siam thei an awm lohna LC/VC 117 a awm a ni.
Tun inthlanah khan dan leh thupek bawhchhiatna lam report an dawng loa, polling party zingah chetsualna tawk an awm lo bawk tih a sawi a. Observer leh returning officer ten mawhphurhna an hlen tha a, Mizoram People Forum, tlawmngai pawl leh political party atanga thawhpuihna an dawng tha chu lawmawm an tih thu a sawi.
Nilaini zana vote chhiar an tih kha, uluk takin SEC chuan a ngaihtuah hnua a ruahman a ni, tiin, state sawrkar a inrawlh lo tih Dr H Lalthlangliana hian a sawi. “Pathianni bawhbuai loa inthlan buaipui zawh vek kan duh a, Nilaini zan inkhawm ngaihpawimawh loh vang ni loin ruahmanna hi siam a ni. Kan beisei ang ngeiin vawiin (Zirtawpni) ah kan zo fel thei a ni,” a ti.
Zawhna chhangin SEC hotute chuan, vote hmuh zat inanga tling zawk tur thumvawr hmanga zawn chu danin a phal sa, returning officer level-a chinfel mai theih a ni a, tun inthlanah hetianga hmanga tling zawk zawnna hi engzat chiah nge awm tih Commission-ah chuan report a lut lem lo tih an sawi.
Vote thi tam riau anga sawi chu, mi pakhatin vote a tih thihin LC/VC member zat (3,5,7) kha chhiar tel zel a ni a, chu chuan a tih tham hmel nia a lan thu commissioner chuan a sawi a. Voter zingah candidate awm zat aia tam chhu (vote) an awm chu vote thih chhan ber nia a lan thu a sawi bawk.
SEC hotute sawi:
8 Inthlana duty tur, PED (persons on election duty) tana vote thlak theih dan an siam chu, buaipui buaithlak deuh mah se, manhla an ti hle a; inthlan danga duty avanga vote thlak thei lo thin mi 3616-in tun tumah khan an mi duhzawng an thlan ve theih phah.
8 Vote chhiar hun inang chu zawngchhang thlak dawn hle in an hria a. Intlar ngai lo (queuless) polling station siam pawh thil tih chi tak, mahse tualchhung tlawmngai pawl nena tanho ngai thil a nih avanga Commission lamin a duhthua a rawt ngawt theih loh thil a ni an ti.
8 Inthlan puan a nih atanga vote thlak hma in candidate tura chhawpchhuah mi 4 an thi a, pahnih chu candidate list tarchhuah hma a nih avangin inthlan hun sawn buai kher ngai loin an chingfel thei. Pahnih dang erawh candidate list tihchhuah tawh hnu a nih avangin inthlan hun sawn a ngai ta a ni.
Inthlanah buaina thleng a awm lo – SEC LC/VC 117-ah sawrkar siam awm rih lo
