Zoremi Hmar Zote
Election campaign lai hian party candidate leh party worker-te hian mi tanpui tur an dap chawp thin a, hmuh lah an hmu thei narawh e. Khawilai emaw-a tlema harsa ve deuh tan inthlan hi thil tha a ni ngawt mai. Inthlan dawna campaign theih chhung chu zîng chhùn zànin vote an zawnpui a, lawmman tha ve pangngai tak an neih ve thin avangin mi harsa leh rethei zual tan chuan thil chhenfakawm tak niin, inthlang deuh sek ta mai ila a tha phian lo’ng maw!
Election campaign lai hi party hrang hrangin hmasawnna tur min tiam hun leh kan ram leh hnam tan tawktarh tha tak tak leh nghahhlelhawm tak tak an neih hun lai a ni a, thil an tih theih hmel hlawm em em mai bawk a. Khawpui chhung chei that leh thingtlang lam thlenga hmasawnna zuang dáwrh dâwrh tura intiamkamna thu an tlangaupui hun a ni. An tihlawhtling thei em em dawn em mawni kan tih thlenga mipui hmaa an thil tum an puan dum dum te tihhlawhtling ngei tur an ni deuh vek thin. Party candidate tute mai pawh an nuih heuh heuh lai, an kaah pawh zen ila min seh dawn lo tih hriat zeta mirethei lainat thut, chhawmdawl ngai ngaihven thut leh in tin hrût chhuaka chibai sem kual, ‘ani hi chu tling pawh ni se min ngaihsak dawn riau’ kan tih tur khawpa min care thut an nih hun lai a ni. An han tling ta chêng a, chhung tin tlawh kual chu sawi loh, an office-ah pawh biak an har ta tálh mai ta thin a; in tin rawn fang kual leh turin min theihnghilh hman hma hian inthlang ta sek zawk mai ila, a tha phian lo’ng maw! (nui uarh lai lem lo mitthlà mai r’u!)
Election campaign lai hi kan ram hruaitu tura in candidate ten traffic jam an vei hun lai, khawpui thianghlimna tura idea nei tha ber vek leh, mirethei hmangaih ber an nih hun lai a ni a. Ei leh bar intodelhna kawnga hmasawnna tur leh ‘a ngaihna hria’ deuh hlir an nih lai a ni. Heng sa, thlai leh buhfai te, kan ni tin ei chawp mamawh hrang hrang kan intodelh dan tur an hre em em a, kut hnathawktu duat thar em em te, zirna kawnga thalaite vei thar em em te, kan sawi vek sêng lo, lal hlâ ang thlupa a sawia an han sawi hi chuan a awihawmin a pawmawm thluam mai a, an han tling ta chêng a, a tak hmuh tur a beitham leh em em mai si thin a, an lo theihnghilh leh hman tawh nge, vote zawn nana hman kha an duh tawk mai tih pawh rin thiam a har riau a, an lo theihnghilh ta a nih vaih chuan an theihnghilh hman lohna turin inthlang sek mai ila, a tha mai lo’ng maw; kan intodelh hma zawk daih ang!
Kan rama inthlan kan hmachhawn danah hian vote zawn nan sum leh pai leh therhlo tawktarh kan ching a, hei hi kan politician-te thiam loh nge mipui lam thiam loh?! A thlawna pawisa sem leh mipui ngaihtuahna hruai kawi thei tur thil kan politician ten an hmachhuan fo mai hi an thiam loh nge mipui thiam loh! NLUP hun lai atang khan tun hma ngaihtuahin Mizo mipui kan thatchhe sawt! Chutih laiin nuai thum sem intiama campaign party khan lo sem ta tak tak se a rah tur chu a lang reng mai. Ram hruaitu atan mi tha thlang lovin, chêng tlêm te duh vangin pawisa sem thei apiang vote kha mipui lamin an tih tur chu a ni mai a, hei hian rah tha aiin thatchhiat inzirtirna, awlsam taka pawisa hmuh duhna chiah a paw chhuak a, ram tana kan vote hlutzia ngaihtuah nachang hre lo, pawisa min pe theitu apiang vote pawi tih lohna, ram vei chhe tê lo mihring a hring chhuak a, thil tha lo tak a ni.
Inthlan dawna vote zawn nan-a pawisa chelektu chuan a dik lo tih hre reng chungin a chelek a, thlan tlin a nih hma hauhin dân palzutin thil dik lovin bul a tan a ni. Sum chelek leh sum leh pâi pêk tiam vanga tling reng reng ram hruaitu tha ni turin beisei loh tur a ni. Mi dik kan duh a, kan ram leh hnam min hruai tura mi tha kan duh a nih si chuan dân ang taka thianghlim taka in-candidate a, sum leh pai vawrh chîng lo ngei chu, thianghlim taka tling ngei tura kan vote khan, Pathian leh kan hnam mitah kan thiang a, kan hlû a, kan fâi a ni. Chutih rualin mipui lam hian sum chelek a, tiam lo thei lo hian kan lo nawrin, kan rilru puthmang a lo dik lo zawk reng tihna a ni thei mai ang em! Kam sum duh luat vang hian an ni’n min hruai khaw lo ni lovin. kan hruai khaw lo zawk a lo ni reng ve thei tho a nia aw.
Chutiang chiahin a dik lo tih hre reng chunga an pawisa tawktarh lo dawng duhtu kan awm zel tih a lang chiang em em mai. A semtu dik lo bawk, a dawngtu lah dik lo bawk, he kan ram zîm tê-ah hian inthlanna dik leh felfai, fair tak neih theih a tha…mai a ni lo, kan Pathian duh dan a ni. Hman deuh khan Gas kan châng a, kan veng pa pakhat, electric dept lama thawk chu a titi tui barh barh hle mai a, Gas an heh lohzia a sawi nan Gas bur khat hi thlaruk te an hmang thin tih a sawi a, mi pangngai chuan electric hmang chi thuk an hmang a, an bill-ah a kal lo a ni ang tih kan hre vek. A hriat miah loh khan a ei rûk phâk tawk a eiru ve ngar ngar a ni tih a inpuang kha a ni hawt a, a zia vak lo.
A dik lo tih hre reng chunga kan phâk tawk ang zel leh, kan ei rûk ve theih chin apiang ei rû a, ram hruaitu tha beisei leh si thin kan ni te hian ka hre thin. Inthlan dawna sum lêng vâk pawh a dik lo tih hriaa dawng duh lo chuan an dawng duh lo mai a, a semtu lamah pawh a dik lo a ni ti-a sem duh lo chuan a sem lo mai. Ram hmangaihna tak tak hi ramri lama invaivung thlâk emaw, vai velh tih lam vel hi a ni lo; kan phâk ang tawka dikna leh rinawmna vawng chunga vote thlâk te, party lam thlir lova mi dik chauh vote tumna thinlung nena vote thlâk leh, kan ni tin khawsak phunga dikna leh rinawmna vawn tlat te hi ram hmangaihna zia rawn irh chhuak a ni a, a mawiin a hlû a, chunglam tan pawh malsawm a nuam deuhin ka ring e. Kan dam a, vote nei kan nih bawk chuan vote thlâk ngei turin kan insawm ni se la, ram tana kan tih theih ve tawk, ho tê anga lang, hlu em em si chu kan ram tana mitha thlan chhuah hi a ni tih i hre reng ang u.