Intodelh nan engineer-ten thui takin mawh an phur
– Chief minister
Intodelh rama chantir turin engineer-ten tam takin mawh an phur tih chief minister Zoramthanga chuan a sawi.
Zirtawpnia Mizoram Engineering Service Association (MESA) annual general conference neih a hmanpuinaah chief minister chuan tunhnaia kan ramin harsatna a tawh hrang hrang chuan mahni kea din a pawimawh zia min zirtir tih sawiin, “Pathianin ram tha tak min pe a, kan leilung, boruak leh tuihna te, lei hnuai hausakna chenin mal min sawm nasa hle. He ram thatna haichhuak a, hmang tangkai a, mahni intodelh rama chantir turin engineer-ten tam takin mawh kan phur a ni tih kan rilruah awm reng se ka duh,” a ti.
Vawi leh khatah sang tak thlen theih loh mah se, hmathlir fel tak nei chunga hma an lak a pawimawh, tiin, “Kan hmabak awm mek hi kan engineer-ten keimahni zawnah chonaah ngai ila, midang pawhin mahni hmazawnah theuh bei sauh sauh ang u, kan ram tungding tur hian kan koah mawhphurhna a awm theuh a ni,” a ti.
Ramin hma a sawnna tura a sulsutute leh a taka thawktu, hmun pawimawh tak luahtu leh mawhphurhna pawimawh tak chelhtu an ni tih Zoramthanga hian a sawi a. Hna lak belh an mamawhna kan hriatpui a, service dangten an mamawhna pawh an hriatpui tih sawiin, chhan hrang hrang vangin sawrkarin sumah harsatna nasa tak tawkin, sawrkar hna lak leh kawng dangah pawh an duh leh tum angin an kal thei rih lo tih an hriatpui a tul tih a sawi bawk.
MESA hi kum 1972 khan member 8 neiin an ding tan a, tunah active member PWD ah 144, P&ED ah 73, PHED ah 67 leh I&WRD ah 16, an vaiin 332 an awm a, life member-te nen member 363 an awm mek.
Intodelh nan engineer-ten thui takin mawh an phur – Chief minister
