Tualpui khuain an khaw pa Pu Lalduhoma chief minister an chawimawi a, a lim an din bawk a. Hetianga Tualpui khuain an khaw pa chhuang taka chawimawi nachang an hria hi an fakawmin an ti tha; chief minister pawh a lawmpuiawm hle a ni.
Tualpui khaw programme-ah hian MLA rual pawh an tel thahnem thawkhat viau a; MLA 11-in chief minister hi an tawiawm a, minister pali an tel nghe nghe. Board hrang hrang chairman neuh neuh leh department hrang hrang official-te nen, chief minister tawiawmtu hi an thahnem thawkhat viau dawn tih a hriat a.
He programme hi sawrkar programme a ni hran lo va, chutih laiin a programme hian chief minister ber a kaihhnawih avangin MLA te tan pawh an pu ber tawiawm chu thil chakawm leh phurawm tak a ni ang tih a hriat bawk. Chief minister hian ‘min rawn zui teh u’ a tih chu a rinawm loh; mahse intawiawm hun a ni tih erawh a hriat ve mai awm e.
“Chief minister leh minister zin inzui vak vakte tihtlem tumin a hautak lo zawnga hmalak a ni ang” tih chu sawrkar thar hruaituten thuneihna an chan hlima an sawi chhuah hmasak pawl kha a ni a. “Chutih rualin, loh theih loh chin a awm ve a, kan inhriatthiam a ngai” tiin an tlip zui a nih kha. “Zirlaiten minister hmuah khap a ni a, inzawn pawh khap a ni” tih pawh an thuhmahruai zingah a tel bawk.
Sawrkar hmasa lamah te khan, inzui duah duah chungchang khan sawi leh sep a kai viau a, mahse chu chuan kawngro a su thui vak lo. Inrenchem sawi rik a nih pawhin, “tui bottle tê” khan a tuar ve a, office expenditure eng eng emaw pawh khan a tuar ve bawk awm e; mahse, austerity measure lak a nih tak chinah thla khat chhungin cheng chuti zat chu hum (saved) a ni, tih thawm kha hriattur a awm ngai lem lo.
Tun tuma Tualpui khawtlang programme-a chief minister tawiawmtute hi ‘loh theih loh’ chin emaw ‘inhriatthiam ngai’ chin emaw-a ngaih lo ni ta pawh ni se, a lehlamah official lirthei 30 rual vel PLO leh a kaihhnawih atana mipui sum luang ral tur hi ‘chhût thuak’ pawhin a theuneu hran lovang.
Inhriatthiam ngai chin hi a lo tam hle ang tih a hlauhawm a, chuvangin ‘inhriatthiam ngai chin’ hi bituk law law ni ta se, inrenchem tura hmalaknaah hian awmzia a nei deuh mai lo’ng maw le!
Inzui duah duah chungchang…
![](https://theaizawlpost.org/wp-content/uploads/tap_logo-min-large.jpg)