Iodine tlakchham vanga awrpuar phah an la awm

Iodine tlakchham vanga
awrpuar phah an la awm
Iodine tlakchham avangin Mizoramah awrpuar an tam thin a, tunah awm tawh loa ngaih ni mah se, Health department-in a zirchiannaah awrpuar phah an la awm reng.
October 21 kha iodine tlakchham avanga taksa leh rilru lama harsatna a thlen thin tihrehna – ‘Global Iodine Deficiency Disorders Prevention Day’ atan hman a ni a. Aizawlah pawh Kulikawn-a Health Workers’ Training School-a zirlaite leh department hotu thenkhatin an hmang.
Hmanpuitu National Health Mission Mizoram mission director Dr Lily Chhakchhuak chuan, he Ni hmanin a tum ber chu, India ram pumah iodine tlakchham avanga harsatna tam tak awm thei do beihpui thlakna a ni. Tunhma lamin Mizoram-ah iodine tlakchham avangin awrpuar a tam thin a, India sawrkarin NIDDCP programme a siam hnua iodine tel lohna chi (salt) zawrh a khap atangin thawktuten theihtawp an chhuahna azarah awrpuar an tlem ta tih a sawi.
Sawrkar laipui thupek angin Mizoram-ah iodine tlakchham hriatna langsar ber, awrpuar survey neih a ni thin a. Survey hmasa ber, kum 1978-a neihah awrpuar zaa 69 hmuhchhuah a ni. National Family Health Survey 2013- 2014 ah chuan Mizoramah awrpuar zaa 6.65 vel an la awm a, kum 2019- 2021 a NFHS 5-ah chuan national goal zaa 5 aia hniam, zaa 0.376 kan ni tawh tih a sawi a ni.
NIDDCP technical officer Dr Nathan Vanlalhruaizela chuan powerpoint presentation hmangin iodine nihphung a sawifiah a. Iodine tlakchham avangin mihring taksa leh rilru-ah harsatna chi hrang hrang siamthat theih tawh loh a thlen thin. Nau chhiat, thla kim loa nau hrin, hlamzuih, nau thisaa piang, pianphunga rualban lohna hrang hrang – tawngtheilo, bengngawng, mitkalh, rilru kimlo leh chaklo, lehkha thiam theilo, sawngnawi, fuke tawi a awmtir thei tih a sawi a ni.
NIDDCP state programme officer Dr Lalawmpuia Chhangte sawi danin,iodine tlakchham avanga mipuiin harsatna kan tawh zel lohnan sawrkarin theihtawp a chhuah a, survey neiin chi sample tam tak test reng a ni a, test kit pawh sawrkarin a thlawnin facilities hrang hrang hman turin a sem chhuak thin.
Kumin chhungin Serchhip district leh Kolasib district-ah survey neih a ni tawh a, mi 2990 test niin hemi atang hian awrpuar zaa 2.64 vel hmuhchhuah niin, chi sample 134613 test tawh niin iodine awm tur zat ang a awm a ni. State laboratory-ah chi sample 300 test tawh a ni bawk.