IPL champion lawmnaa innek buainaah mi 11 thi
India chhim lam, Karnataka-a khawvela Twenty20 cricket tournament lar ber, Indian Premier League (IPL)-a tual chhung team an champion lawmna cricket khelmual pawna pungkhawmte innek buaina chhuakah mi 11 vel an thi a, mi dang eng emaw zatin hliam an tuar bawk.
Karnataka Chief Minister Siddaramaiah chuan, “Khatiang zata tam an punkhawm kha tute mahin an beisei phak lo,” a ti a. “Khelmualah khan mi 35,000 chauh an leng a, mi 2,00,000-3,00,000 velin luh an tum si a ni,” a ti.
“Mi 11 thi an awm a, mi dang 33-in hliam an tuar bawk,” a ti.
He chhiatna hi Nilaini zing lama an state khawpui, Bengaluru-a M Chinnaswamy Stadium-a mi sang tel pun khawmnaa thleng a ni.
India-a NDTV broadcaster pawhin mi 11 vel an awm thu hi a tar lang a. Tual chhung TV news channel-te chuan police-in hliam tuar an bawihsawm lai leh thenkhat nikhawhrelova awm chunga ambulance-a an hlang laite an tilang.
Deputy Chief Minister DK Shivakumar-a pawhin ‘pungkhawmte chu thunun ngaihna an awm lo’ niin thuthar lakhawmtute hnenah a sawi.
Thawhlehni zan khan IPL-ah hian a vawi khat nan Royal Challengers Bengaluru chu an champion a, a tuk zinga lawmnaah innek buaina hi a chhuak ta a ni.
India-ah hian mipui punkhawm tamnaa innek buaina hi a lo thleng fo tawh thin a. January-ah pawh khan khawvela sakhaw thila punkhawmna lian ber, Maha Kumbh Mela hman laiin an lui thianghlima inbual tura kal khawm Hindu mi 30 vel an lo innek hlum tawh a ni.
IPL champion lawmnaa innek buainaah mi 11 thi
