I&PR director-in district office tlawh

I&PR director-in district office tlawh
Information & Public Relations director C Lalnunkima chuan tunhnai hian District I&PR office a tlawh kual a. Thawhtanni khan Hnahthial DIPR office a tlawh hnu ah Siaha-ah riakin Siaha DIPRO office a tlawh. Thawhlehni khan Lawngtlai DIPRO office a tlawh leh a, Lunglei DIPRO office a tlawh leh bawk.
I&PR director hi kumin September 30 hian superannuation pension a chhuak dawn a. A chhuah hma in district lama an office hrang hrang hi a tlawh chhuak a, thawktute bakah District MJA lam nen an inkawm a ni.
District IPR leh District MJA inkara thawh dunna tha tak awm thin chu lawmawm a tih thu a sawi a. Hmalam hunah pawh thawh dunna tha zawk nei zel turin a chah. Sawrkar thuchhuak dik taka thehdarh kawngah DIPRO office chuan mawh a phur lian hle, tiin, sawrkar rin tlaka thawk thin turin a chah. MJA leh I&PR chuan mipuite tana an tangkaina hriatchian a tul tih a sawi a. Chanchinthar thehdarh kawngah tan la sauh sauh turin a chah bawk.
Kum thum leh a chanve chhung I&PR director hna chelh theia Pathian hruaina a chang chu lawmawm tiin, he hna a chelh chhunga department hmasawnna tam tak awm chu a thawhpuite tawiawmna tha tak avangin an chungah a lawm tih a sawi. An mamawh zawna MJA-in an tuamhlawm thinna leh thawhpuinaah lawmthu a sawi a ni.