Iran-a lungawi loh lantirnaah mi 2,000 chuang thi awm tawh

Iran-a lungawi loh lantirnaah mi 2,000
chuang thi awm tawh
Iran-a venhim hna thawktuten lungawi loh lantirtu an beih letnaah mi 2,000 chuang an that tawh niin mihring dikna chanvo humhalhtute an sawi a, hetih lai hian US President Donald Trump-a chuan Iranian-te chu anmahni puihna tur ‘a lo kal mek’ tih a hrilh.
US-a Human Rights Activists News Agency (HRANA) chuan ni 17 liam ta chhungin mi 1,850 thah an ni tih a sawi a. An zinga 135 hi sorkar mi an ni a, naupang pakua bakah lungawi loh lantirnaa tel ve lo pakua an tel bawk tih a sawi.
Iranian thuneitu pawhin Reuters hnenah mi 2,000 thah an ni tawh nia sawiin a mawhpuh tur erawh ‘firfiakte’ tiin a sawi.
Thawhlehni khan Trump-a chuan a Truth Social platform-ah Iranian thuneitute chu mi an thah avangin ‘a man to tak an chawi dawn’ tih a tar lang a, mipuite chu ‘kal zel turin’ a nawr bawk.
“Lungawi lote thah an tihtawp hma chuan Iranian thuneitute nena kan inkawm tur pawh ka TITAWP. TANPUINA TUR A LO KAL MEK,” a ti.
Trump-a hian sipai chakna emaw, thil dang emaw hmanga chet lak rin a ni a, tunah hian Iran nena sumdawnna kalpui ramte lakah chhiah 25% a la dawn tih a puang tawh.
Lungawi loh lantirna hi Iran province 31 awma khawpui 180-ah kalpui mek a ni a, Iranian tangka hlutna tlahniam nasa leh khawsak man sang lutuk avanga intan a ni.
Rei lo te chhungin politic-a inkaihhruaina thlak duhnaah a chang zui a, kum 1979 Islamic revolution atanga puithiam kaihhruaina hnuaia awm tawh an nihna chu thlak an duh.
Ningani kal ta atangin a nasa zual a, thuneituten tharum hmangin an hmachhawn tan bawk a. Internet leh inbiakpawhna dang pawh tihthih vek a ni tawh bawk.
HRANA chuan Thawhlehni chawhnu khan mi 2,003 vel thah an nih tawh thu an sawi a, heng bakah hian mi 779 thi nia sawi an dawng bawk tih an sawi.
Pawl dang, Norway-a Iran Human Rights (IHR) pawhin mi 734 vel thi an awm tawh niin a sawi bawk.
Reuters chuan Iranian thuneitu sang, a hming tar lan loh hnen atangin thi hi mi 2,000 chuang an ni tawh tih a sawi a. Lungawi loh lantirtu leh venhim hna thawktute thihnaah hian ‘firfiakten’ mawh an phur niin a sawi bawk.