US President Donald Trump-a chuan Iran nena inbiaknaa palaite chu ‘inremna siam hmanhmawh lo turin’ a hriattir tih a sawi a, a hma lawkin inremna siam a hnaih tawh thu a lo sawi tawh bawk.
Inremna tur sawiho mekah hian ni 60 chhung inkahhai pawh sei tur te, Strait of Hormuz hawn lehna tur leh Iran-in nuclear programme a neih chungchanga inbiak chhunzawm zel dan tur te a tel nia sawi a ni.
Social media-ah Trump-a chuan inbiakna chu ‘a tha zawngin a kal’ thu a sawi a, ‘lehlam lehlam hian an a hun takah an tihfel a ngai’ a ti bawk.
Trump-a chuan Inrinni khan inremna siam tura indawrnaah ‘a tam zawk sawi fel’ a nih thu a sawi a, puan thuai a nih theih thu sawi.
Iranian thuneitute pawhin kartawp khan hetiang bawk hi an sawi a, foreign ministry thupuangtu, Esmail Baghaei-a chuan an pahnih hian inremna siam turin ‘an inhnaih hle a, a la hla hle bawk’ niin a sawi.
US chanchinbute chuan inremna siam hi a tawpna ber a ni lo va, a khirh lai ber thenkhatte a hnua sawi chhunzawm tura dah a ni tih an tar lang hlawm a. Heng zingah hian Iran hrekna tihziaawmna tur huam chin leh a hun tur te, khawih chet theih lohva Iran sum dah tihchhuah te leh Washington-in Iran-in nuclear-a thil tum a neih tihtawp a phut chungchang pawh a tel.
Thawhtanni khan US Secretary of State Marco Rubio-a chuan Delhi-a thuthar lakhawmtute a kawmnaah, ‘strait hawn theihna kawngah thil chiang tak dawhkanah a awm’ tih a sawi a, ‘nuclear chungchangah inbiakna tak tak, pawimawh, hun bituk neia indawrna tur siam a ni’ tih a sawi bawk.
US leh Israel hian February 28 khan Iran hi nasa takin an bei a, Middle East ram pumah buaina chhuak zui a. Iran hian Gulf-a Israel leh US tanrualpui ramte chu beiin khawvela tuialhthei leh liquefied natural gas phurh 20% vel kalna, Strait of Hormuz chu a khar a. Khawvel pumah tuialhthei man a san phah.
April thla tir lama inkahhai an remtih hnu rei vak lovah US chuan Iran lawng chawlhhmunte a khar zui a, hei hi Trump-a chuan ‘inremna siama chiang tawk tak thil fel a awm chuan chhunzawm zel a ni ang’ tih a sawi zui bawk.
Pathianni khan Truth Social-ah Trump-a chuan Iran-in nuclear ralthuam a siam theih loh thu chu ‘a hriatthiam a ngai’ tih a sawi nawn leh a. Tehran erawh chuan a nuclear program chu a muanawm zawng chauhva tih tum a nih thu vawi tam tak a lo sawi tawh thung.
US chanchinbua thenkhat chuan inremnaah hian Iran hian uranium a tihchakte chu hlan a remti thei niin an tar lang hlawm.
Indo a chhuah tan lai khan Iran hian uranium 440kg vel a nei niin an ngai a, chu chu 60%-a thianghlim thlenga tihchak a ni a. Ralthuama siam turin 90% thlenga tihchak ngai chu a hlat lo hle a, theory chuan nuclear bomb siam mai thei a ni.
Iranian President Masoud Pezeshkian chuan sorkar TV hnenah an ram chu ‘nuclear ralthuam neih tumin hma kan la lo tih khawvel hriattir turin a inpeih reng’ a ti.
Rubio-a hian a hmain inbiaknaah hian hmasawnna ‘pawimawh tak, a tawp ber ni lo’ a awm tih a sawi a. Darkar 48 kalta chhunga hmasawnna chuan ‘pawisa chawi awm lova strait hawn vek’ a thlen theih thu a sawi.
Inrinni khan Baghaei-a chuan sorkar television hnenah Iran chuan ‘memorandum of understanding’ a tifel mek a, hei hian ‘inremna tak tak’ atan inbiakna dang neih belh a phalsak dawn a ni.
Trump-a pawhin Inrinni vek khan Truth Social-ah inremna hi ‘memorandum of understanding’ tiin a tar lang bawk.
Pakistani Deputy Prime Minister Ishaq Dar-a chu inbiaknaah palai a ni a, tun hnaia inbiaknaa thil tha chhuak tur ‘an thleng dawn’ tih a sawi bawk.
Iran-a palaite inremna siam hmanhmawh lo turin Trump-a’n a ti
