Iran-ah reformist vs hardline

June 5 khan Iranian president thar tur thlanna neih niin hardline conservative leh reformist ten president nih an inchuh a ni.
President thlanna hi 28 June inthlanah candidate tumahin majority an hmuh phak loh avanga neih nawn a ni a, inthlan hmasaah khan vote 40% chauh a tla bawk a, president thlan tawha vote tlak chhiat ber a ni bawk.
Candidate zinga pakhat chu Dr Massoud Pezeshkian niin heart surgeon hlui leh Iran in morality police chimawm tak a neih sawisel tu ani a, a elpui ber chu Saeed Jalili niin status quo tena an thlawp a ni thung.
Iran president thlanna hi president nilai Ebrahim Raisi chu May thla khan helicopter chesualah amah leh midang pasarih te nena an thih vanga neih a ni.
Dr Pezeshkian hian ‘inlungrualna’ chu hmathehah neiin chu mai bakah Iran chu khawvelin a kawmserhna ata talchhuahpui a aupui a.
Khawthlang ram te nen “constructive negotiation” neih duhin kum 2015 nuclear deal tluchhe tawh tharthawh leh khawthlang ram hrekna tihtawp a nih theih nana a nuclear programme kalpui te her rem a aupui bawk.
Jalili erawh nuclear negotiator hlui niin Iran a religious community te, hardline anti-Western bur tena an thlawp a ni thung a.
President chuh tur hian candidate te chuan Iran Guardian Council puithiam leh jurist 12 te awmna thiltithei tak te an paltlang phawt a ngai a ni. Guardian Coucnil te hian candidate 74 lai an hnawl a ni.
Guardian Council hi human rights group te chuan Iran regime laka rinawm lova an ngaihte hnawl zelah puhin an lo sawisel tawh bawk.
Iran ah kum 2022-23 khan anti-regime protest liantham tak awmin chu chuan danglamna a siam nasa hle a. |halai zawk leh middle-class Iranians te chuan sorkar lakah rinhlelhna nasa tak neiin president thlanna thawhkhatnaah pawh vote a tlakchhiat em em phah tia sawi a ni.
Inthlan thawhkhatnaa vote tla kha kum 1979 Iranian revolution thlen hnua vote tlakchhiat ber a ni bawk.
Iran social media ah chuan Persian hashtag “traitorous minority” tih chu a viral hle a, mipui te chu vote thlak tura ngenna niin vote thlak duh lo te chu ‘phasantu’ tia sawi a ni.
Mahse Supreme Leader Ayatollah Ali Khamenei chuan vote tlachhia chu a rorelna mipui tena an pawmlohna lantirna tia sawi chu a hnawl thung a.
“Vote tlakchhiat chhan a awm ngei ang a, politician leh sociologists ten an zirchiang ang. Mahse, vote thlak duh lote chu sorkar laka lawmlo tia sawina erawh dawt a ni” tiin Ayatollah Ali Khamenei chuan a sawi.