Iran-in IRGC intelligence chief thar ruat

Iran-in IRGC intelligence chief thar ruat
Iran chuan an sipai tha bik, Revolutionary Guards chief intelligence thahsak an nih hnuah Ningani khan a thar an ruat tih sorkar hnuaia Irna news agency chuan a puang.
Islamic Revolutionary Guards Corps (IRGC) commander Major General Mohammad Pakpour-a chuan Brigadier General Majid Khadami-a chu intelligence division hotu thar atan a ruat niin Irna hian a tar lang.
Pathiannia Israel-in a beihnaa Revolutionary Guards officer dang pahnih, Hassan Mohaghegh leh Mohsen Bagheri te nena thah tak, Mohammed Kazemi a ai a awh dawn a ni.
Pakpour-a pawh hi June 13-a Israel-in Hossein Salami-a an thah hnuah commander atan hian ruat thar a ni ve deuh chiah bawk.
“Tun hnaiah kan commander martar ta pahnih, Kazemi leh Mohaqeq te kaihhruai IRGC Intelligence hian hma a sawn nasa hle a, IRGC hian kawng hrang hrangin intelligence lamah kawng thar a zawh a ni,” tiin Pakpour-a chuan a sawi.
Israel hian kar hmasa tawp atang khan thlawhna hmangin Iran-a nuclear hmun leh sipai hmunte a kap tan a, an hmelma kumhlun ram hian nuclear ralthuam siam a tum niin a puh a, Tehran chuan a pha nasa hle thung.
Israel hian Iranian hotu lawk tak tak a that hnem tawh hle a, Iran pawhin nasa takin a ti let a, Ningani pawh khan damdawi in kahsakin mi eng emaw zatin hliam an tuar.
Iranian Supreme Leader Ali Khamenei-a’n kar kal ta Zirtawpnia IRGC commander atana a ruah hnu lawkah Pakpour-a hian Israeli-te beihna an chhan let tur thu sawiin ‘hremhmun kawngkharpui’ a inhawng dawn tiin a sawi a ni.
Israeli hotu lawkte chuan Khamenei-a pawh hi thah an tum zingah a tel niin an sawi a; mahse, tun maia tih erawh an tum lo.