Iran chuan, Saudi Arabia-in Iranian President Ebrahim Raisi chu ram pahnih tena diplomatic lama inzawmna neih leh remtihna an siam hnuah an ram tlawh turin a sawm tiin an tarlang.
Saudi Arabia tlawh tura sawmna hi King Salman chuan a pechhuak tia sawi a ni a, mahse, Saudis lam chuan official-in engmah sawi an la nei lo thung a.
Middle East-a Arab ram lian leh thiltithei pahnih te hi tun hma atanga inbakkaih reng niin tun hnai lawkah China hmalaknain inbiakna neih a ni a, thawh dun remti dunin chu chuan helai region geopolitics a thlak danglam thei hle tura ngaih a ni.
Senior Iranian official, Mohammad Jamshidi chaun Saudi capital, Riyadh tlawh tura sawmna hi tweet in Raisi chuan Iran chuan inzawmna tha zawk a awm zel theih nan a inpeih hle tiin a sawi zui bawk a.
Hei bakah hian Iran Foreign Minister Hossein Amit-Abdollahian chuan ram pahnih ten foreign minister level-ah inbiakna neih an remti tia sawiin inbiakna hmun tur pathum chhawpchhuah mek a nih thu a sawi bawk a.
Middle East ram pahnih inhal kumkhua te hi tun hnaia China hmalaknaa inbiakna an neih hmangin thawh dun zel an tum tawh nia sawi niin boruak duhawm lama awm theih nan hma an la dun zel tia sawi a ni bawk.
Ram pahnihte chuan thla hnih chhungin embassy hawn ve ve an intiam bawk a, hei bakah hian sumdawnna leh security lama thawhdunna pawh kalpui an intiam ve ve bawk.
Ram pahnih inlaichinna siam thar hi khawvel ram te chu lawm leh fimkhur takin an dawngsawng thung a, chung zingah chuan US leh United Nations pawh an tel a, a hmaa inremna lo siam tawh ten rah tha a chhuah zui ngai loh avangin an fimkhur thung.
Saudi Arabia hian January 2016 a Tehran a lungawilo tena a embassy an beih avangin inzawmna a lo chhu chhe tawh a, a hmain Riyadh chuan Shia Muslim cleric Shikh Nimr al-Mimr chu a khaihlum avanga lungawilohna lantirna vang a ni.
Kha mi hnu atang khan Sunni leh Shia te inbakkaihna chuan nasat zual lam panin hei bakah hian helai region velah ram pahnih te chuan chungnung zawk nih tumin hma an la zui zel bawk a. Syria leh Yemen tualchhung indonaah an thlawp lam a inang lo ve ve bawk.
Amir-Abdollahian chuan Saudi ally rinawm Bahrain nena inzawmna tha neih an beisei thu a sawi bawk a. “Iran leh Bahrain inkara inhriatthiamlohna te pawh chhutchahin a aw kan beisei a, embassy te hawn a nih zui theih nan hma kan la ang,” tiin a sawi bawk.
Bahrain erawhin engmah sawi a la nei lo chungin Iran-Saudi inremna siam chu lawmawm a tih thu erawh a sawi thung. Iran chuan Arab rival dang Jordan leh united Arab Emirates te nen pawh thawhhona tha zawk an neih theih a beisei thu a sawi zui bawk.
Iran leh Saudi inhnaih zel
![](https://theaizawlpost.org/wp-content/uploads/2023/03/ir.jpg)