Iran nena an boruak karah US-in a sipaite Middle East a pantir

Iran nena an boruak karah US-in a sipaite Middle East a pantir
US chuan Iran nena an inkar boruak sang zel karah a indo thlawhna phurtu lawng lian (aircraft carrier) chu Gulf a pantir.
US sipaiten Middle East an luh hnuhnung ber chu June kha a ni a, a hnu lawkah Iranian nuclear hmunpui pathum an kap zui a, Israel leh Tehran chu ni 12 an indo zui bawk.
Tun thla khan US President Donald Trump-a hian Iran-a sorkar duh lohna lantirtute lam a tan thu sawiin thuneituten an beih let pawhin ‘puihna a lo kal mek’ tiin a sawi a; mahse, kar hmasa khan sipai chettir a tum mai rinna chu daiin mipui lungawi loh lantirna pawh a dai zui.
Trump-a hian Ningani khan US ‘armada’ (sipai rual)-ten Gulf region an pan thu leh Iran chu an thlurbing thu a sawi a. Thuneitu dangte pawhin aircraft carrier strike group leh hmanraw dangten Middle East an thleng thuai dawn tih an sawi bawk.
“Iran kan thlir a, Iran panin tha chak nen kan kal mek,” tiin Trump-a chuan a sawi.
“Kan hmang kher lo thei a, lawng tam tak erawh chuan an pan mek a. A tul thuta che thei turin an lam panin an kal a, eng nge lo thleng kan thlir ang,” a ti.
Aircraft carrier Abraham Lincoln chuan chawlhkar khat chuang liam ta khan South China Sea a panna kawng thlakin Middle East a hawi a. A thlawhna phurh zingah Iran laili pawh kap thei, Tomahawk cruise missile-a thuam, Arleigh Burke-class destroyer-te pawh a tel.
Middle East pan mek US sipai lawngte hi Aegis combat system an tih, boruak atanga kahna leh missile laka invenna nen thuam an ni bawk.
Washington-in Iran nuclear hmunpui a kah khan tuihnuailawng atang leh B-2 bomber hmangin Tomahawk missile 30-in an bei nia hriat a ni.
US thuneitu pakhat chuan Iranian beihna laka Middle East-a US thuthmunte an ven theih air defence system pawh dah belh an tum niin a sawi bawk.
Iranian sorkar chanchinbu chuan sorkar duh loh lantirnaah khan mi 3,117 thah an ni tih sawiin heng zinga 2,427 chu civil mi leh venhim hna thawktu an ni tih an sawi.
US hian Middle East-ah hian kum tam tak atang tawhin sipai hmun a nei a, sipai 40,000 – 50,000 vel an awm a. Council on Foreign Relations chuan hmun 19 velah an inbun nia sawiin thenkhat hi chu a nghet lova an awmna niin an tar lang.
Heng zinga Bahrain, Egypt, Iraq, Jordan, Kuwait, Qatar, Saudi Arabia leh United Arab Emirates-a partate chu a ngheta an luah a ni.
US hian Middle East-ah hian July, 1958 khan indo mi Beirut-ah tirin an awm tan a. Lebanon-ah hian sipai an dah tam lai berin Marines leh Army 15,000 vel an awm thin.
Iranian sipai leh Islamic Revolutionary Guard Corps inkara hotu lian, Ali Abdollahi Aliabadi-a chuan Ningani khan sipai chakna hmanga an ram beih a nih vaih chuan Iran chuan an chhehvela US hmunte chu an bitum nghal vek tur thu a sawi.
Revolutionary Guard commander General Mohammad Pakpour-a pawhin a hnu ni hnihah khan ‘tun ang aia Iran a inpeih lai a awm lo va, silai hmet turin an kut a inring’ tih a sawi a. Washington leh Israel chu ‘thil chhut sual theihna pumpelh turin’ a chah bawk.
Washington chuan tun hnai khan US a chet chuan Tehran-in a chhan let ve tur thu a sawi hnuah Middle East-a an mi hnathawka awm thenkhat a hawtir tawh nghe nghe.