Iran WC squad-ah Azmoun tan hmun a awm lo!
Tunlai buaina avangin Asian giants Iran chu Israel nen tangruala an ram beitu US leh a thenawm ram pahnihte inthlentawm tur kumin World Cup-ah hian an tel lo mai ang em tih zawhna a pian mek laiin an chhuah ngei tur thu tihchian a nih hnuah Iran squad pawh tarchhuah a ni tawh a, tah chuan an ram tana goal khung hnem pathumna ni pha forward Sardar Azmoun telh a ni lo!
United Arab Emirates club Shabab Al-Ahli tana khel mek Azmoun hnawl a nih chhan hi sport lam kaihhnawih vang ni loin an ram sawrkar thu awih lo zinga puan a nih vang a ni!
Tun indo buai hma lawka Iran rama tualchhung helna leh lungawilohna lianpui chhuak an hmehmih hnuah Iran sawrkar chuan tualchhung buainaa sawrkar laka hel nia a puhte lakah hremna na tak a lekkawh an a, ram infiammi langsarte thlengin tihhlum zingah an tel a; tunlai buaina chhuak meka an sawrkar demna lam hawi a tarchhuah avangin an footballer hriat hlawh tak pawh hi World Cup khel thei lo zawngin an dangbet zui leh ta niin a lang!
Azmoun hian March thla mai khan US leh Israel nena an sawrkar indona a duh lohzia lantirna ni ngeia ngaih theih turin an sipaite’n missile hmanga an beih thenawm ram zinga pakhat UAE ruler Mohammed bin Rashid Al Maktoum nena an thlalak chu social medai lamah a phochhuak a, hei hian an sawrkar a tithinrim nia ngaih a ni.
Tarlan tak angin, US sipaite’n Iran beihna hmanrua atana an hman ram zinga mi UAE hmun thenkhat chu Iran hian a bei a, heti ang boruak hnuaia UAE ram hruaitu nena an thla lak dunna lo tarchhuah chu thil tih chi niin a lang lo!
Ram tan game 91 khela goal 57 thun tling tawh Azmoun hi 2026 World Cup khel tur squad la thlitfim leh tur (preliminary squad)-ah takngial pawh telh a ni lo a; zin chhuak tak tak tur squad puanah pawh Iran coach Amir Ghalenoei chuan a telh zui ta chuang lo a ni.
World Cup khel tura Iran fehchhuak hi Mexico chuan a mikhual theih tur thu puangin, he ramah hian an inkulh fel tawh nghe nghe.
Mexico president Claudia Sheinbaum chuan tournament thlengtu pui ber US chuan an hmelma sarwkar atanga chhuak Iran team mikhual hi an chak vak lo niin a sawi!
Iran squad-ah hian an player langsar dang pahnih Mehdi Taremi leh Alireza Jahanbakhsh-te hmuh tur an awm thung.
Kum 33 mi ni ve tawh Taremi hi Greek club lian Olympiakos tana khel lai niin, Brighton winger hlui Jahanbakhsh hi Belgian Pro League club Dender nena contract nei lai a ni.
Iran hian an bultanna June ni 15 inkhelah New Zealand tumin, an hmachhawn leh tur Belgium (June 21) game nen Los Angeles khuaah ve ve an group stage match hmasa pahnih an khel dawn a, June ni 26-ah Egypt nen Seattle khuaah an innuai chhunzawm leh ang.
Iran World Cup squad
(Club hming tarlan loh zawng hi Iran ram chhunga khel an ni)
Goalkeepers: Alireza Beiranvand, Payam Niazmand, Hossein Hosseini
Defenders: Ehsan Hajsafi, Milad Mohammadi, Ali Nemati, Shojae Khalilzadeh, Hossein Kanaanizadegan, Danial Eiri, Ramin Rezaeian, Saleh Hardani
Midfielders: Saman Ghoddos (Kalba, UAE), Saeid Ezatolahi (Shahab al-Ahli, UAE), Mohammad Ghorbani (Al-Wahda, UAE), Rouzbeh Cheshmi, Amirmohammad Razzaghinia, Mohammad Mohebi (Rostov, Rus), Mehdi Torabi, Mehdi Ghayedi (Al-Nasr, UAE), Alireza Jahanbakhsh, Aria Yousefi
Forwards: Mehdi Taremi (Olympiakos, Gre), Amirhossein Hosseinzadeh, Ali Alipour, Shahriyar Moghanlou (Kalba, UAE), Dennis Eckert (known in Iran as Dennis Dargahi, Standard Liege, Bel)