Iranian Intelligence Minister Khatib-a thah a ni

Iranian Intelligence
Minister Khatib-a thah a ni
Iranian Intelligence Minister Esmail Khatib-a chu thah a ni tih an ram president-in a nemnghet.
Israel-in Nilainia thlawhna atanga an kahnaah Khatib-a an thah thu an sawi hnuah Masoud Pezeshkian-a chuan ‘dawihzep taka an thah’ vang hian Iran chu ‘lungngaihna thuk takah’ a awm tih a sawi.
Israel-in Iran venhimnaa hotu lawk tak, Ali Larijani leh paramilitary Basij force hotu, Gholamreza Soleimani-a te an thah thu an puan tukah Khatib-a a thih thu hi puan a ni.
February 28-a indo tan nia Supreme Leader Ayatollah Ali Khamenei-a thah a nih atang khan Israel leh US chuan sorkar hruaitu lawkte tukdawl nan Iranian hotu lawk leh commander tam tak an that tawh.
X-ah Pezeshkian-a chuan thuneitute thihna chungchangah Iranian-te a tawrhpui thu a sawi a, ‘an kawng chu a hma aia nghet zawkin a kal zel dawn tih a chiang’ tih a sawi.
Nilaini tuk khan Israel Defence Minister Israel Katz-a chuan Israel-in Tehran a beihnaah Khatib chu ‘tihboral’ a nih thu a lo puang tawh.
“Prime Minister Benjamin Netanyahu-a leh kei hian phalna dang lak belh ngai lovin Iran hotu lawk tu pawh, an tan hnuchhui leh beihpui an thlak nena inzawmna neite chu tibo vek turin thuneihna kan pe a ni,” a ti.
Thuchhuah siamin Israel Defence Forces (IDF) chuan Iran-a intelligence ministry chu sorkarin ‘mi a nekchepna leh firfiaka thil a tihah’ thlawpna kawngah a thawhhlawk hle tih sawiin, tun hnaia Iran-a mipuiin lungawi lohna lian tak an lantirah pawh khan Khatib-a hian ‘lungawi loh huaihawtte man leh thahnaah chanvo pawimawh tak’ a chang tih an tar lang.
Khatib-a hi Iran defence minister atan kum 2021 khan president hlui thi ta, Ebrahim Raisi-a chuan ruat.
Khamenei-a telin puithiam lawk tak tak hnuaiah Islamic dan a zir a, intelligence ministry leh Supreme Leader pisaah chanvo sang tak tak a chelh bawk.
Kum 2022 khan US Treasury chuan Iranian intelligence ministry-a hotu nia ‘US leh a tanrualpui ramte laka cyber kaihhnawiha tihbuai tumnaa a tel avangin’ a hrek.
Nilaini khan Central Tehran-ah mipui tam tak pungkhawmin Larijani, Soleimani leh tun thla tira US-in Sri Lanka tuipui kama Iran indo lawng a tihpila thi mi 84-te vuina hun hman a ni.
Iran sorkar chuan indo tan atang khan Israel leh US-in an ram an beihnaah mi 1,300 chuang an thi tawh a, heng zingah hian hmeichhia 226 leh naupang 204 an tel niin an sawi.
US-a Human Rights Activists News Agency (Hrana) chuan thi zat hi hei aia tam niin an sawi a, Thawhlehni khan civil mi 1,354 leh sipai 1,138 an thi tawh tih a tar lang a, mi dang hriat chian loh thi 622 an awm tawh bawk niin an sawi.
Iran chuan Middle East ram pumah an ram beihna hi a chhang let a. Nilaini khan Israel a beihnaah mi pahnih an thi a, Dubai, Qatar, Kuwait, Iraq, Bahrain leh Saudi Arabia-ah te bomb puak leh drone kah a awm bawk.
Indona avang hian energy thawn chhuahna kawngpui pawimawh, Strait of Hormuz chu khar zel niin tuialhthei man a sang mek zel.