Iranian sipai leh roreltute tawp hunah chuan indo a tawp thei – Trump

Iranian sipai leh roreltute tawp hunah chuan indo a tawp thei – Trump
US President Donald Trump-a chuan Iran nena an indona chu a sipaite leh roreltute tihboral a nih hnuah chauh tawp thei a ni tih a sawi a. Hetih lai hian Tehran chuan missile leh drone hmangin Middle East ram hrang hrangte kap chhunzawmin an hruaitu lu ber thlang turin hma lam an pan mek bawk.
Trump-a hian Air Force One atanga thuthar thehdarhtu hnena tuidalhthei sumdawnna tibuaia tichhe thei leh khawvel zin veivahna tibuai mak indona tihtawp tura inbiakna neih a duh loh thu a sawi hnu lawkah US thawhpui Israel chuan Iran pumah beihpui thlak thar a nih thu puang a, tuialhthei dahna hmun pawimawh tak takte an bei tih a sawi.
Trump chuan, “Engtik lai emaw chuan, ‘Kan inpe,’ ti tur an awm tawh lo theiin ka ring,” a ti.
Saudi Arabia, Kuwait, United Arab Emirates leh Bahrain sorkarte chuan Inrinni zan leh Pathianni zing khan Iranian drone hmanga beih an nih thu an sawi a, Kuwait-a sorkar office block pakhatah kangmei nasa tak a chhuak.
Pathianni zing khan Norway khawpui, Oslo-a US embassy-ah pawh thil puakin chhiatna tenau a thlen a, hliam tuar an awm lo niin police-te chuan an sawi a. Eng thil nge puak hi hriat chian a la ni lo.
Saudi Arabia chuan Tehran hnenah Iran-in an lalram leh a energy sector a beih chhunzawm zel chuan Riyadh chu kawng hrang hranga chhang let turin a nawr thei tih a hrilh niin a hretute chuan Reuters an hrilh.
Gulf ram pum huapa thinrimna tihziaawm tumna ni ngeia ngaih theih turin Iranian president chuan Inrinni khan heng ramtea US hmunhmate an beih avangin an thenawm ramte hnenah ngaihdam a dil.
Masoud Pezeshkian-a hian Trump-a’n a hmaa Islamic Republic-in intiamkamna awm lova inpe tura a phutna chu ‘suangtuahna mai’ a tihsak a, an ram atanga an hnaih ramte beihna erawh tihtawp an remtih thu a sawi.
Pezeshkian-a thusawi hi Iran-a duh rorum thenkhatin an duh lo va, hei vang hian a pisa chuan US hmunhma atanga beih an tawk a nih chuan Iranian sipaiten an chhan let ve tur thu a sawi nawn leh.
Iran-a an Supreme Leader tur thlang tura mawhphurtu clerical body chu indona chhuah tirh thi, Ayatollah Ali Khamenei-a thlaktu tur ngaihtuah turin Pathianni khan an thukhawm dawn niin an ram chanchinbute chuan an tar lang.
Israel sipaite chuan X-ah Khamenei-a thlaktu tur chu tu pawh ni se an umzui zel dawn tih an sawi lawk nghal tawh bawk.
Trump-a hian kum 2003-a Iraq a beih hnua Middle East-a US sipai beihpui thlakna lian ber a kalpui mek chu chu a tul tih sawiin a finfiahna sawi lovin Tehran hi US tan hlauhawm tak a nih thu a sawi.
Iran chu nuclear ralthuam siam mai thei dinhmun a ni tawh tih a sawi bawk.
US leh Israel hian Iran-a uranium tihchak tawhte dahkhawmna veng turin special force tirh chungchang an sawiho tawh niin Axios chuan a tar lang a. Inrinnia nuclear hmun venhimna atana leia sipai tirh theih chungchang an zawhna chu Trump-a chuan ‘nakin lawkah an tih theih tur thil a nih thu a sawi a ni.
Hetih lai hian Tehran khawpui hmun thenkhatah thil puak ri nasa tak a awm niin sorkar chuan a puang a, Israel chuan Inrinni khan Iran missile hmun, command center leh fuel depot-te a kap niin an sawi.
US-Israel tang dunin an beihnaah hian Iranian civil mi 1,332 an thi tawh a, mi sang tam takin hliam an awm tawh niin Iranian UN ambassador Amir Saeid Iravani-a’n a sawi.
Iranian hmeichhe sikul kah fuha naupang tam tak thihna chu US sipaite hian mawhphurtu an nih thu US thuneituten Reuters an hrilh tawh a. Trump-a erawh chuan finfiahna sawi lovin Inrinnia thuthar thehdarhtute a kawmnaah Iran tih angin a sawi thung.
Air Force One-a Trump-a hnunga ding, Defence Secretary Pete Hegseth-a chhui chian mek a nih thu a sawi ve thung bawk.
Iran-in beihpui a thlaknaah Israel-ah mi 10 an thi tawh a. US service member paruk an thi tawh a, Iran chuan Pathianni khan Kuwait-a US hmun a kap tih a sawi bawk.
Iran nena tangrual, Hezbollah-ten ramria silai an hmetpuak hnuah Inrinni khan Israel-in Lebanon-ah beihpui a thlak thar leh bawk a. Israel chuan Beirut chu Hezbollah firfiakte an thunun loh chuan ‘a man to hle dawn’ tiin a vau zui a, Thawhtanni atanga Lebanon an beihnaah mi 300 vel an thi tawh a ni.
US leh Israel tang dunin Iran an beihna hian energy man a tisang a, khawvel sumdawnna leh bungraw phurh kualna a tibuai a, thlawhna zin a tikhaihlak nasa hle bawk.
Kuwait-a national oil company chuan Inrinini khan tuialhthei an siamchhuah a tihtlem tan a, a hmain Iraq leh Qatar-in tuialhthei leh boruakalhthei an siam an titlem tawh a. A man pawh kum tam tak chhunga a san ber lai a thleng a, buaina avang hian a phurhna kawng lun tak, Strait of Hormuz khar a ni bawk.