Iraq-a bazarna hmun kangah mi 60 thi
Iraq-a Kut khawpuia an bazar hmun lian tak kangah mi 60 vel an thi tih thuneituten an sawi.
Ni nga liam ta chauhva an hawn mall-ah hian Nilaini zan khan kangmei hi a chhuak a, Ningani chawhnu khan thelh mih a ni.
Social media-a video darhah chuan kangthelhtuten a chung atanga mi an chhanchhuak laite a lang a, sorkar chanchinbu chuan chin hriat loh an la awm nual niin a puang.
Region Governor Mohammed al-Miyahi-a chuan, “Kan chungah vanduaina lian tak leh chhiatna a lo thleng a ni,” a ti a, dan angin shopping centre neitu lakah thil kalpui a nih tur thu a sawi a. Thite chu ni thum chhung an sun dawn thu a puang bawk.
INA-a news channel-in video a tihchhuahah chuan khawpui lailia Corniche Hypermarket hi a chhawng eng emaw zat meiin a tuam hlup hlup a, kang thelhtuten thelh tuma an bei lai a lang.
Social media-a clip darh dangah chuan a kan lai hian a chung zawlah mi tlem an awm a, a chhungah mi an kang lai a lang bawk.
al-Miyahi-a chuan mi eng emaw zat chhanchhuah an ni tih tual chhung chanchinbute a hrilh.
Baghdad chhimchhak km 160 vela hlaa awm khawpuiah hian Ningani tuk zing dar 04:00 thleng pawh khan ambulance hmanga hliam leh ruang damdawi ina tlanpui an la awm.
“Kangmei avang hian pawisawi lo khua leh tui 61 an thi a, a tam ber hi bual ina tawma boruak tlachhama thi an ni a, mi 14 erawh an ruang kang chhe vek niin tute nge an nih hriat a la ni lo,” tiin interior ministry chuan thu a chhuah.
Bazar lian taka kangmei chhuah chhan hi chhui hna thawh nghal a ni a, ni hnih hnuah chhuina hmasaa thil hmuh chu an hriat theih tur thu al-Miyahi-a chuan a sawi.
Iraqi in sakah hian himna tura thil kalpui a tha lo hle thin a, hei hi inawpna fel fai tawk loh bakah ei rukna avang a ni tel.
Kum 2023 khan Iraq hmar lama Kristian inneih lawmna hmuna kangmei chhuakah mi 100 chuan an thi a. Kum 2021 khan Nasiriya-a damdawi ina Covid veite dahna hmun kangah mi 90 chuang an lo thi tawh bawk.
Iraq-a bazarna hmun kangah mi 60 thi
