Iraq-in Sweden nena inzawmna chhuchat

Sweden-a Iraqi pakhat Quran bu hal tum laka thinrimte chuan Baghdad-a Swedish Embassy chu Ningani khan luhchhuah tumin an bei tawh a, hei vang hian diplomatic lama ram pahnih dinhmun a chhe hle.
A hnu lawkah Iraq prime minister chuan Islamic holy book Sweden a hal tumna avang hian Sweden nena diplomatic lama inzawmna an neih a chhu chat zui nghal a ni.
Baghdad-a Swedish embassy chu lungawilo pungkhawmte chuan hun rei tak awmchilhin flag te vaiin Iragi Shiite cleric leh political leader Muqtada al-Sadr thlalak te pholangin chet an la a ni.
Heng thil thlen chhan hi Sweden-a Iraqi asylum-seeker in Stockholm khawpuia Quran hala a vau vang a ni a.
Baghdad-a Swedish embassy luhchhuah a nih hnua lungawilote an kal kian hnuah kharin a awm zui nghal a, eng hunah nge hawn a nih dawn tarlan a ni lo.
Security officials tena meeting an neih hnuah Iraqi Prime Minister Mohammed Shia al-Sudani chuan thuchhuah siamin Iraqi thuneitute chuan dan kalha chea embassy suasamtute chu an hrem tur thu a sawi a.
Chutih rual chiah chuan thuchhuah a siamah Iraqi sorkar chuan Sweden hnenah an rama Quran hal a nih vaih chuan diplomatic lama an inzawmna chhut chah a ni ang tiin an sawi zui nghal bawk a.
A hnu lawkah Sudani chuan Swedish ambassador chu Iraq atanga hnawhchhuah a nih nghal thu sawiin embassy pawh kharsak nghal an ni tiin a sawi zui leh bawk a ni.
He mi hnu lawk hian Stockholm a Iraqi embassy pawnah mipa pahnihin anti-Islam protest an nei zui ve thung a. Pakhat chu Swedish media-te chuan Salwan Momika, Iraqi mi Christian origin nei mah se Sweden a chen hnua atheist inti niin an sawi a. Quran chu a kea chhirin mahse a hal em lo thung a.
Momika hian Iraqi flag pawh petin chu mai bakah al-Sadr leh Iran supreme leader Ayatollah Ali Khamenei thlalak a chhir zui bawk a ni.
Iraq Media and Communications Commission chuan Iraq rama Swedish communication company Ericsson te chu an sumdawn an khapsak nghal thu an sawi bawk a. Ministry of Communications pawhin Swedish company te nena an inzawmna an chhut chah nghal tur thu an sawi bawk.
Hetih lai hian Stockholm police te chuan Iraqi Embassy pawna mi pahnih tena lungawilohna an lantir chu an remtihna hnuaiah a nih thu sawiin mahse Quran hal an tum thu erawh an hriat lawk loh thu a sawi thung a.
Sweden-ah lungawilohna lantir chu constitution-in a humhalh tlat a nih thu sawiin kum 1970 tir atangin Blsphemy law paih a nih tawh thu a sawi bawk a. Police te chuan lungawilohna lantir chu mipui nawlpui tana buaina awm thei a nih leh nih loh azirin phalna an pek mai thu a sawi thung.
Muslim-te tan thung chuan Quran hal chu an sakhua nasa taka diriamna anga an ngaih a ni a, Quran hal avang hian Muslim world-ah buaina leh harsatna nasa tak a thleng fo tawh a. Afghanistan-ah pawh Sweden rama Quran hal a lo nih tawh avangin Taliban-te chuan Swedish organisation te activity tiin an lo khapsak tawh bawk a.
Thla kalta pawh khan social media-a Momika inti chuan Stockholm a mosque pawnah Quran chu Muslim holiday EId al-Adha laiin a hal avangin Islamic world ten demna nasa tak an lo sawi tawh bawk a.
A hma lawk pawhin Stockhom a Turkey embassy pawnah far-right activists chuan Quran a hal avangin Sweden-in NATO zawm a tumna kawngah pawh Turkey lungawi lovin harsatna a siamsak phah tawh bawk.
June thla pawh khan Quran hal kaihhnawihah al-Sadr thlawptute chuan Baghdad ah Sweden embassy luhchhuah tumin hma an lo la tawh a, Baghdad khawpuiah lungawilohna nasa taka lantirin a lo awm tawh bawk.
Al-Sadr hi Shiite cleric lar tak fapa niin a pa chu kum 1999 khan tihhlumin a awm a, Iraqi dictator hlui Saddam Hussein thupeka tihhlum anga ngaih a ni.
A hnuah erawh Saddam loyalist leh Shiite extremist te chuan American forces te an bei dun thung a. AL-Sadr sipai te hi Shiite Islam hmun pawimawh bomb avanga Shiites leh Sunnis te inbeihna thlenga meizanghlaptu nia ngaih niin hei vang hian Iraq chu kum tam tak a buai nuai nuai phah a ni.
Iraq sorkar siamna lamah pawh sulsutu pawimawh ni reng thei niin a party chuan October 2021 parliamentary election-ah pawh seat an nei tam ber bawk a. Mahse, thuneihna chang turin seat a ngah tawk lo thung a, nikum August khan politics a chawlhsan tur thu a puan avangin amah thlawptute chuan lungawilohna nasa tak an lantir a ni.