Tunkar Thawhlehni khan Sports Minister Mansukh Mandaviya chuan a hun taka tan theih loh leh dinhmun him lo taka ding hman Indian Super League (ISL) tan hun atan February ni 14 an ruat fel tih a puang a, tun dinhmunah Odisha FC tih loh nikuma ISL khel team dang 13-te’n an tel tur thu an tichiang tawh.
Team 14 an inlan kim thei a nih chuan top-tier ISL season tharah hian match 91 khelh a ni dawn a, home-and-away basis hmangin team tinin match 13 theuh an khel tling ang.
He thu buatsaih lai thlenga an tel dawn leh dawn loh la tichiang thei lo awmchhun Odisha FC an inhnukdawk a nih chuan 2025-26 season-ah hian match 78 a awm ang a, club tinin game 12 theuh an khel thung ang.
All India Football Federation (AIFF) chuan Odisha FC pawhin an tel tur an tihchian thuai an beisei thu an tarlang a, nizan khan thuchiang an nei hman tura ngaih niin, he thu buatsaih lai hian an thutlukna hriat hman a ni lo.
Odisha FC hi Durand Cup leh Super Cup lamah pawh an inlan lo a, ISL dinhmun a derthawn hnu khan competitive lamah an inrawlh ta lo a, nikum August thla khan an player leh staff-te contract pawh an titawp lailawk tawh a ni.
Nikum (2024-25 season)-ah khan April ni 12-ah ISL final an khel hman a; kumin hian March 23-31 chhungin FIFA window (international break) a tla dawn a, tah hian India hian 2027 Asian Cup qualifying round match an khelh a ngai ang a, April thla hnu lamah chuan India ram chu khawlum lutukin a tuam chho leh tawh ang a, ISL tan tlai hi an tuar chhunzawm zel dawn niin a lang!
ISL 2025-26: Tel tur chiang tawh team 13
