ISL 2025 khel turin AIFF-in kawng a sial zel!

ISL 2025 khel turin AIFF-in kawng a sial zel!
Ruahman lawk angin, nimin khan All India Football Federation (AIFF) leh Indian Super League (ISL) club zawng zawng aiawh theuhte chu ISL 2025 kawng sial turin an inhmukhawm a, he meeting zawhah hian AIFF president Kalyan Chaubey chuan kumin kum tawp lama Indian Super League huaihawt a nih ngei a beisei thu amah ngaichangtu chanchinbumite hmaah a sawi.
Tarlan tawh thin angin, AIFF leh sumdawnna lama an thawhpui, ISL organiser ni bawk Football Sports Development Limited (FSDL)-te chu tun thlengin contract thar ziah (Master Rights Agreement) chungchangah an la inrem thei lo a, hei vang hian kuminah ISL season thar an khel thei dawn em tih a chiang ta lo a ni.
Hei hi boruak awm dan a nih rih avangin Bengaluru FC leh Odisha FC-te chuan an hnuaia thawk staff leh first team player-te hlawh an rek rih tawh loh tur thu an puang a, ISL champion tum hnih ni tawh Chennaiyin FC pawhin Bengaluru leh Odisha hnungzuiin an first-team player leh staff-te hlawh pek an chawlhsan lailawk thu Nilaini khan an puang ve ta bawk!
Nimin, Ningani khan AIFF leh ISL club thenkhat an inhmukhawm a, he hunah hian All India Football Federation chuan ISL a tawp mai lohna’n rawtna siamin, top-tier league khelh dan kalphung (format) thar duanchhuah hun leh season thar tan theih hun chu la sawi theih ni rih lo mah se kumina ISL club-te’n competitive match khelhna hun thawl an neih theihna’na kawng lo sial lawk tha an ti a, chu mi atan chuan Super Cup khelh hun tihdanglam an rawt a, September chawlhkar hnihna emaw chawlhkar thumnaah emaw khelh ni se tiin rawtna an tarchhuak.
Dan pangngaiah chuan Super Cup hi season tawpa khelh thin a ni a, kumin chu a heti teh nuai tak avang hian season kick off-na atan an vauchher ta zawk a ni!
National federation president Chaubey chuan an inhmuhkhawm boruak sawiin, “AIFF chuan ISL club-te’n competitive match khelh hun an neih theihna’n Super Cup football tournament chu September thla chawlhkar hnihna emaw thumnaah emaw tan ni se tiin a rawt a.
“AIFF leh ISL club 13-te chuan lungrual takin national huapa tha ber tur zawngin thutlukna an siam a; tun atanga ni sarih atanga ni 10 inkar chhung hian kan meeting leh dawn a, tah chuan thutlukna tak tak kan khawrpum tawh ang,” a ti.
Nimina inhmuhkhawmnaah khan Mohun Bagan Super Giant, East Bengal leh Odisha FC aiawhte tel lo tura sawi thawm ri chhuak bawk mah se online (virtual) hmangin meeting an zawm ve ta tho a; ISL dang dang 10-te chuan New Delhi-a an inhmuhkhawmnaah aiawh palai an tir vek a ni.
Chaubey chuan ISL season thar chiang lo ruai chungchang sawiin, “Tun season-ah hian kan lo tan tlai ta deuh a nih pawhin ISL hi khelh leh theih ngei kan beisei a, mahse, a eng lai kalphung hi nge kan thlakdanglam dawn tih a la chiang thei lo a, a khelh dan kalphung (format) a ni thei a, a dang deuh pawh a ni thei bawk a, chu erawh kan la rel tur a ni a, tun dinhmunah eng thutlukna mah siam a la ni lo,” tiin amah beiseitu media mite hnenah thil awmzia a sawifiah.
India hian kumin October ni 9-14 chhungin AFC Asian Cup qualification round-ah Singapore a hmachhawn dawn a, he national team fixture hma ngei hian Super Cup chu an khelh rin a ni.
Indian club football-a league sang ber ni chho tawh ISL hi dan pangngaiah chuan September thla atanga a kumleh April thla chhunga khelh mi niin, kumin hian season thar an tan thei a nih pawhin September thla hi chuan an tan thei lo tura ngaih a ni phawt rih.
Kumin December ni 8 hian ISL huaihawttu Football Sports Development Limited leh All India Football Federation inremna (contract) Master Rights Agreement an lo ziah tawh chu a tawp tawh dawn a, tun thlenga contract thar ziah theih a la nih loh avangin ISL 2025 chu dinhmun derthawngah a ding ta mek a ni.