ISL club-te insingsa mek
Harsatna lian tak paltlangin Indian Super League (ISL) khelh hun atan thla thar February ni 14 an nemnghet ta a; All India Football Federation (AIFF) chuan ISL season thar khel tur club-te chu vawiin Thawhtanni chhun dar 12 thleng hi an home match khelhna tur khelmual thehluhna hun atan an bituksak.
Tarlan tawh thin angin, sumdawnna lama ISL thawhpui tur (commercial partner) an hmuh zawh loh avangin ISL season thar chu a hunah an tan thei lo a; club leh player-te pawh an mangang hman a, mahse, karliamta Thawhlehni khan sports minister Mansukh Mandaviya chuan ISL tan hun tur a puang thei ta hram a, season liamta lama inlan club 14-te bawk kha team chhuak leh tur an ni.
He top-tier ISL season tharah hian home-and-away basis-in match 91 an khel dawn a, club tinte home venue thehluh hun tawp atan vawiin chhun hi ruat fel a ni ta a, ISL zawng an tan dawn ni ngeiin a lang ta!
Club tinte hnena lehkha an thawnah AIFF chuan Indian Super League khel tura an sawmna an pawm vek avangin lawmthu an sawi a, Deputy General Secretary M. Satyanarayan hminga lehkha an thawn chhuahah chuan sum chungchang an tarlang tel.
AIFF thuchhuah chuan ISL 2025-26 season budget belhkhawm atan Rs. 24,26,74,000 ruahman a nih thu an sawi a, chu’ng zinga Rs. 9,77,40,000 chu sum hmahruai atan AIFF lamin an thehchhuak ang a, a tel tur club tinin Rs. 1,00,00,000 an thawh ve thung ang.
Club-te tum ve tur hi instalment-a pek phalsak an ni a, kumin June thla hi pek tlak theih hun tawpna atan bituksak an ni.
Kan hriat thin angin, ISL hian sumdawnna lama thawhpui tur an la hmuh zawh miau loh avangin ISL organiser tur an la nei lo a, Indian club football tawp ngawt tur ngai ngam loin AIFF lamin sum an thawh phawt dawn a, club-te tum ve tur pawh heti hian an ruahman ta a ni.
ISL club-te insingsa mek
