ISL huaihawttu ni duh an awm lo!
India rama football league sang ber Indian Super League (ISL) huaihawt phalna (commercial rights) chu kum 15 chhung atan Nita Ambani enkawl Football Sports Development Limited (FSDL) hnena pek niin, thla thar hian chu inremna chu a tawp tawh dawn a, tunge ISL huaihawt chhunzawm duh awm che u tiin All India Football Federation (AIFF) chuan tender a tichhuak a, chhangtu an awm loh avangin 2025-26 ISL season tan hun tawh lutuk chu a zuzi hlen mai dawn em tih a hriat loh zual zel!
Kum 2010 December ni 9 khan AIFF leh FSDL neitu Reliance Industries leh International Management Group-te chuan inremna ziakin, an inrema angin FSDL chuan heti kum chhung hian AIFF hnenah cheng vaibelchhe 700 tehreng an chhunglut a; FSDL lam hian ISL tihchhuah man (broadcast), sponsorship, digital leh merchandising rights zawng zawng an chang ve thung a ni.
An sawi dan chuan cricket atchilhna rama top flight football league atang hian Ambani-te chuan hlawkna an hmu lo mai ni loin an hloh nasa hle tih a ni a; chutah AIFF chhungkaw inrelbawlna avangin Supreme Court lamin hun engngemawchen ISL commercial rights changtu thar tur zawn a han khap ren rawn a, ISL season thar pawh a hunah an tan thei lo ta reng a nih hi!
Tunah India rama court sangber leh AIFF an inrem ta a, ISL huaihawttu ni duh zawnna an han tichhuak bawk taknaa tender chhangtu reng reng an awm eih loh thu football federation chuan tun Pathianni kalta mai khan Supreme Court a hriattir ta hlawl a, Indian football top tier hmalam hun a derthawng ta takzet a ni.
Tarlan tak angin, AIFF chuan October ni 16 khan tender a tichhuak a, a hma ang bawkin tender chhangtu chuan kum 15 chhung atan league broadcast, sponsorship, digital leh merchandising rights an chang leh ang tih a ni a, mahse, tender chhan theih hun hnuhnungber tun November ni 7 deadline thlenga chhangtu an awm tak loh avangin All India Football Federation chuan an dinhmun Supreme Court a hriattir nghal a ni.
Tender chhangtu awm palh thulha ngaihtuahtu tur Bid Evaluation Committee (BEC) an tih chu Justice (Retd.) L. Nageswara Rao kaihhruainaa din niin, AIFF hnen atanga chhangtu an hmuh zawh loh thu an dawn hnu hian he committee hi an inhmukhawm nghal nghe nghe a; Supreme Court hnen atanga kawhhmuhna dang nghah mai loh chu kawng dang a awm ta rih lo niin a lang!
ISL huaihawttu ni duh an awm lo!
