Islamabad bomb puaka Pakistan puhna India-in chhang

Islamabad bomb puaka Pakistan puhna India-in chhang
India chuan Pakistani Prime Minister Shehbaz Sharif-a’n an khawpui, Islamabad-a thihchilh bomb puakah New Delhi inrawlh anga a sawina chu an ram hruaitu ‘suangtuahna’ mai leh dik lo taka ‘thil phuahchawp’ mai niin a sawi.
Thawhlehni chhuna Pakistani khawpuia court tuala thilhchilh bomb tihpuaha mi 12 an thih hnu lawkah Sharif-a hian ‘Indian thlawp pawl’ an inrawlh niin a sawi a ni.
Indian external affairs ministry thupuangtu, Randhir Jaiswal-a chuan chhang nghalin khawvelin thil nihna tak an hriat thu leh Pakistan ‘mangang’ thu phuahchawp chu an ring chuang lo tih a sawi.
“India chuan Pakistani hruaituin suangtuahna sawi chhuaka tanchhan awm lo leh inpuhna tur fiahna awm miah lo hi chiang takin a hnawl a ni,” tiin puhna chungchanga zawhna a chhang.
“Pakistan hian sipaite duh dan anga dan an hman mek leh an ram chhunga thuneihna inchuhna nasa tak karah a mipuite mit lak sawn nan India lakah thu phuahchawp a sawi ang tih hi rin sa a ni,” a ti bawk.
Sharif-a sorkar hi an rama eptu party tam tak chuan an danpui siam thatah Chief of Defence Forces nihna thar an siam chu tun lai hian an sawisel nasa hle a ni.
“Khawvel hian thil tak tak zawk chu a hria a, Pakistan mangang tal velin a mitthla thil mai mai a sawi hian kawng dik lovah a hruai chuang lo vang,” tiin Jaiswal-a chuan a sawi a ni.
Islamabad court tuala thihchilh bomb puak hi Pakistani Interior Minister Mohsin Naqvi-a chuan a tipuaktu hi court chhunga luh a tum a, a theih loh avangin gate bula police car bulah a tipuak ta niin a sawi.
He thil thlengah hian mi 12 an thi a, mi dang 27 velin hliam an tuar bawk a, kum thum hnua Islamabad-a thihchilh bomb puak leh hmasa ber a ni.
Prime Minister Sharif-a chuan ‘Indian thlawp pawl’ an inrawlh niin a sawi zui nghal a, hetih lai hian Defence Minister Khawaja Asif-a chuan Afghan Taliban-ten bomb tihpuah hi thu an thawnna niin a sawi ve thung.