Islamabad mosque-a thihchilh bomb puakah mi 31 thi

Islamabad mosque-a thihchilh bomb puakah mi 31 thi
Pakistani khawpui, Islamabad-a mosque-ah Zirtawpni tawngtaite beia bomb puakah mi 31 vel an thi a, mi 169-in hliam an tuar bawk tih thuneituten an sawi.
Police thuneitute chuan bomb paituin thihchilhin Tailai venga Shia mosque luhna gate-ah a tipuak tih an sawi a. Hetih lai hian thil thleng hmu leh hriate chuan a hnuah silai ri pawh a awm zui niin BBC an hrilh bawk.
Damdawi inah hliam tuarte phurh thlen an nih mek laiin emergency puan zui a ni a, thisen pe theite tlawmngaia thawk chhuak turin an inngen.
Pakistani Prime Minister Shehbaz Sharif-a chuan thil thleng a dem thu leh ‘pawi tak zet’ a tih thu a sawi a. Ngun taka chhuiin a phena awmte chiang taka an hai chhuah vek tur thu a sawi.
President Asif Ali Zardari-a pawhin ‘pawisawi lo civil mite beihna hi mihringpuite laka pawikhawihna lian a ni’ tih a sawi a. Defence Minister Khawaja Asif-a erawh chuan India leh Afghanistan an inrawlh theih thu a sawi thung.
Social media-ah Asif-a hian a beitu hi Afghanistan-a zin leh let leh a ni tih ‘finfiah’ a ni tih a sawi a, ‘India leh Afghanistan inthlunzawm dan hai lan a ni’ tih a tar lang.
Indian foreign ministry chuan he thil thleng hi a dem thu sawiin nunna chân an awm chu a tawrhpui thu a sawi a, an tel ve anga sawina erawh ‘tanchhan awm lo’ tiin a sawi bawk.
Afghan foreign ministry thupuangtu, Abdul Qahar Balkhi-a pawhin beihna thleng a dem leh a tawrhpui thu a sawi a, hetiang beihna ang chi hi chu ‘Islam zirtirna leh mihringte hlutna kalh tlat a ni’ tih a sawi.
Pakistani Minister of State for Interior Talal Chaudhry-a chuan a titu nia an hriat hi Afghan a ni lo tih a sawi ve bawk niin tual chhung chanchinbuten an tar lang hlawm.
United Nations Secretary-General Antonio Guterres-a thupuangtu chuan beihna chu ‘na takin a dem’ a, a mawhphurtute ‘finfiah veka an laka rorelna lek ni se a duh’ tih a sawi.
Khadijatul Kubra Mosque atanga thlalak darh zuiah chuan pheikhawkte chhuatah a darh nuai a, darthlalang a keh a, mite chu a keh karah an thu hlawm tih a lang.
Pakistani defence minister chuan a beitu hian silai a hmet puak hmasa a, venhim hna thawktuten an beih let hnuah a bomb pai a tipuak ta niin a sawi.
Islamabad Deputy Commissioner Irfan Memon-a chuan thi hi mi 31 leh hliam tuar mi 169 niin X-ah a tar lang.
Tual chhung damdawi inah chuan an buai hle a, mi mal lirthei leh ambulance hmangin hliamte phurh then an ni a. News agency AFP tana thlalatu pakhatin a lak fuhah chuan a hlawmin mi eng emaw zat an phurh thlen lai a lang nghe nghe.
November-a beihna thlengah mi 12 lo thi tawh mah se Pakistan-ah an khawpui berah tak hian hetiang hi a thleng tam lo hle thung a. Beihna thlen hnuhnung ber hi courhouse tualah niin mi 27-in hliam an tuar bawk.
Zirtawpnia thil a thlen hma lawk hian chawlhkar khat chhung vel an ram chhimthlang, Balochistan province-ah tharum thawhna nasa takina thleng thung a, civil mi 58 vel an thi a ni.
Balochistan Liberation Army (BLA) hel pawl chuan heng beihnate hi an tihah an chhal a. Kum tam tak hel laka beihpui lo thlak tawh sipaite pawhin a chhan let nan thawk chhuakin an bei let a, hel 200 chuang an that niin an insawi ve bawk.
Nikum kha Pakistan-a kum 10 chuang chhunga helho chetna leh anmahni beih letna avanga thi an tam ber kum niin a hma kum aiin 74% vel zetin a tam zawk a. Thi zinga a zahve chuang hi hel pawla mite niin sorkar hnuai ni lova chhuituten an sawi.
Pakistan Institute for Conflict & Security Studies (PICSS) chuan Pakistan-a tharum thawhna thleng avang hian nikumah mi 3,413 thi an awm a, kum 2024 khan 1,950 an thi a. Nikuma thi zinga 2,138 chu hel niin an sawi a ni.