Islamist hel, JNIM-ten Burkino Faso-ah mi 20 that

Islamist hel, JNIM-ten Burkino Faso-ah mi 20 that
Al-Qaeda nena inzawm Islamist hel pawl, JNIM-ten an tih nia an chhalah Inrinni khan Burkino Faso hmar lama Titao khua an beihnaah mi 20 vel thah an ni tih sawi a ni.
Thi zingah hian Ghanaian pasarih, ‘tute nge an nih pawh finfiah har khawpa kang nasa’ pawh an tel niin Ghana-a Interior Minister Mohammed Muntaka Mubarak-a chuan a sawi.
Anni hi tomato-a sumdawng niin lorry-a an phur chu jihadist-te hian an lo bei a. A hmunhma kalpawhna kawng chu dan a ni tih Ghanaian thuneitu, an mi dam chhuakte thiar chhuah tum pakhatin a sawi a, embassy-a thawkte tan pawh a hmun hi thlen a har niin a sawi.
Ni li liam ta chhung khan Burkina Faso hmar leh khawchhak lamah Islamist helho chetna a tam hle.
Burkina Faso-a sipai roreltu, jihadist-te tharum thawhna tihtawp tuma intiam chuan heng beihna thlenga thi zat dik tak hi an la puang lo.
Hetih lai hian Pathianni khan sipai thupuangtu chuan engkim thunun tawh a nih thu a sawi thung.
“Inrinni khan hmar lamah beihna a thleng nual a. Kan sipaiten huaisen taka bei letin mi firfiakte hnehin tam tak an that a ni,” tiin Lt Col Abdoul Aziz Ouedraogo-a chuan sorkar enkawl, RTB a hrilh.
Ouedraogo-a hian heng beihna hi sipaiten hmar leh Sahel region-a beihpui an thlak hnuah a nih thu leh an um darh helho chu khawthlang lam pana insuih fin leh an tum niin a sawi.
Titao-a thil thleng hi hmutute chuan a beitute hi pawl thumah an insiam niin an sawi a. Pakhatin sipai camp, a dangin telephone leh a dangin dawr leh supply truck beiin an rawk niin an sawi.
A hming sawi duh lo, venhim hna thawktu pakhat chuan AFP news agency hnenah ralthuam keng jihadist ‘za telin’ Titao camp luhchilhin an tichhe nual tih a sawi a. Helho hian hmar lama Nare khuaa sipaite pawh an bei niin a sawi a, sorkar chuan a la sawi lo thung.
Titao-a sipai hmun hi beih mai hlauhthawn sa a ni a, Burkinabè sipai hmunah chuan venhimna tihthatna ber pakhat a ni a. A hma ni hnihah khan French broadcaster RFI chuan JNIM hel ni ngeia rinten khawchhaka Bilanga khua an thunun a, sipai 18 an that niin a lo sawi tawh a ni.
Thawhtanni khan Ghanaian interior minister chuan embassy thuneitute tel lova thite phum mai tum, Burkinabè thuneitute nen an inbia tih a sawi.
Ghanaian dam chhuak thenkhat chu puih an ni dawn tih a sawi a, “Hliam na vak lo tuar hmeichhiate chuan an vuinaa tela an thla laka document neih an duh,” a ti bawk.
Thite hi an ruang pawh a tawih tan niin a sawi.
Minister chuan Burkinabè thuneitute hian ‘hliam tuar ve lo hmeichhia leh hliam tuarte chu mitthi vui zawhah Ouagadougou-a kan embassy-ah sipaite nena hruai dan tur an ngaihtuah’ niin a sawi bawk.
Tomato leh purun phurtu truck khalhtu pawlte chuan lirthei khalhtuten an lirthei khuh an tum laiin a beitute hian an hal niin an sawi.
An pawl hian a hma pawhin Burkina Faso ang rama purun leh tomoto-a sumdawnga ramri kâna an tlan nasat avangin an tan kawng him a awm theih an duh thu an lo sawi tawh thin a. Tun tuma thil thleng hi thlai thar hralhna kawnga thil hlauhawm tak an tawh nasat theihzia lantirtu niin an sawi a ni.