Israel-a dikna chanvo humhalhtu pawlten Palestinian-te suatah an ram puh

Israeli mihring dikna chanvo humhalhtu pawl pahnih chuan Israel-in Gaza-a indo a kalpui mekah Palestinian mipuite suat a tum niin an sawi.
B’Tselem leh Physicians for Human Rights-Israel hian Thawhtanni khan thla 21 chhung kal taa buainaa thil thlenga an thil hmunte an tlangzarh.
Israel-a kum tam tak chhung thil tam tak lo thawk tawh pawl pahnih hian thuchhuah intawm an siamah ‘pawikhawihna chu a tap vat’ a tul tih an sawi.
Israel-a dikna chanvo humhalhtu pawl zinga hetiang thu sawi hmasa berte thu sawi hi Israeli sorkar thupuangtu chuan hnam suata puhna chu a pha.
“Kan sipaite hian mi firfiakte an tum a, civil mite an ti ngai lo. Gaza tawrhnaa mawhphurtu chu Hamas an ni,” tiin David Mencer-a chuan a sawi.
Thawhtannia Jerusalem-a thuthar lakhawmtute an kawmnaah B’Tselem’s executive director Yuli Novak-i chuan an pawl report-ah hian ‘an lo mitthla ngai loh thil an ziak’ tih a sawi.
Phek 88-a chhah report-ah hian, “Israel-in Gaza Strip-a thil a kalpui leh na taka a chetna rah, Israeli politician leh sipai commander-ten beih chhan leh an tum an sawite chuan Israel hian Gaza Strip-a Palestinian-te suat a tum tih chiang takin a tilang,” an ti.
Phek 65-a chhah report, Physicians for Human Rights Israel (PHRI)-in an tihchhuahah pawh hriselna lam bik dan hmanga an chhuinaah Israel hian Gaza-a inenkawlnate chu ‘mumal tak leh chhut lawkin’ an bei tih an tar lang.
“Finfiahnate chuan Gaza-a damdawi in leh nunna chhan nana pawimawhte chu mumal taka duan leh tumin beih a ni a, damdawia puihna pekna tibuaiin inthiar chhuahtir an ni a, damdawi thiamte thah leh hren an ni,” an ti bawk.
Pawl pahnih hian indona chhuah chhan ber, October 7, 2023-a Hamas-in Israel an beihna kha a rawng tih pawh an hmu tih sawiin hei hian Israeli-te zingah hlauhna leh titna a siam tih an sawi bawk.
Hetih rual hian beihna chhan let nana Israel sorkar chet dan chu ‘hleihluak taka chete ngaihdan kalpuiin Gaza-a Palestinian-te chu mihringa chantir lohna’ a ni tih an sawi.
Politics leh sipai hotuten indonaa an sipaite hnena thu an chah tuartu chu Gaza-a Palestinian-te an ni tih an sawi.
PHRI hian report an siamah hian Israel pawhin an hming an ziah hnan, 1948 Convention on the Prevention & Punishment of the Crime of Genocide Article II-in tih dan tur a khap zinga mi an ti ngei tih an tar lang bawk.
Israeli pawl pahnih hma pawh hian khawvel huam dikna chanvo humhaltu pawl, , UN human rights expert leh mi thiam dang tam tak pawhin Israel hian Gaza-a mite a suat tih an lo sawi tawh thin.
International Court of Justice (ICJ) pawhin South Africa-in Israeli sipaiten Gaza-a Palestinian-te an suat nia a puhna a thlen pawh a lo ngaihtuah tawh.
Israel hian October 7, 2023-a Hamas-ten an ram beia mi 1,200 chuang an thah leh hren tura mi 251 an hruai avangin Gaza hi a bei a. Israeli sipaite chetna avang hian Gaza-a cheng mi 59,900 chuang an thi tawh.