Israel beihna avangin Iran sipai pali an boral tawh
Tun thlatir lama Iran in missile hmanga a beih avanga phuba lakna atan Israel chuan beihpui a thlak chho zel a, Iran chuan an sipai pali in nunna an chan tawh thu a sawi.
Israel Defence Forces (IDF) chuan zirtawpni zing atang khan Tehran leh Iran chhim lama missile factory bakah hmun thenkhat beiin, buaina hi a la chhuak chho zel dawn niin a lang bawk.
Iran foreign ministry chuan lo invenna kawngah tihtur an nei thu sawiin, ‘Iran chuan khawvel remna leh muanna bakah, invenhim a ngai pawimawh a, hmalak dan tur a la ngaihtuah ang,’ a ti.
October ni 1 kha Iran hian ballistic missile 200 vel kapchhuakin, Israel lamah hian a surtir nghek mai a, Israel chet letna tur hi kar tam tak chhung mipuiin an ngaichang thup reng a ni.
Israel beihna hi Iran sipaite chuan theihtawpa an lo do let thu Tehran chuan sawiin, hmun thenkhatah erawh chhiatna tlemte a thlen thu an sawi.
Israel beihpui thlakna avang hian nunphung a la khaihlak em em loh thu Tehran chuan sawi zuiin, lirtheite pawh an dan pangngaia an la tlan theih thu an sawi a, zirna in leh infiamna hmunte pawh dan pangngaia la kalpui a nih thu an sawi bawk.
Hetih lai hian Tehran chuan Israel chu chhan let a la ngai mai thei nia sawiin, an ruahmanna tlangpui erawh engmah an sawi chiang duh rih lo thung.
Israel beihna avangin Iran sipai pali an boral tawh
