Israel chetna vangin Gaza-a inenkawlna keh darh vek – WHO chief
Israeli-ten na zawka leia an beihna leh insaseng tura thupek an chhuah avangin Gaza-a damdawia inenkawlna chu keh darh vek tih piah lama chhia leh harsa a nih thu World Health Organization (WHO)-in a sawi.
Dr Tedros Adhanom Ghebreyesus-a hian hmar lama Beit Lahia leh Jabalia-a Indonesian, Kamal Adwan leh al-Awda damdawi inte chu Thawhlehnia chhuahsan tura tih huama awm an ni tih sawiin damdawi in dang pahnih pawh km khat biala awm tho an nih thu a sawi.
Kamal Adwan hi a bul hnaia inbeihna a nasat avangin hna a thawk thei lo va, Indonesian hospital hi a chhehvela Israeli sipai an tam lutuk avangin tlawh ngam a ni lo niin a sawi bawk.
Al-Awda hospital hi hna a la thawk a; mahse, an director chuan Thawhlehni khan ‘inkahna nasa takin’ a chim niin BBC a hrilh.
Israel Defense Forces (IDF) chuan ‘heng lai velah hian mi firgiak an bei’ niin an sawi a, damdawi in khawih tumna an nei lo niin an insawi.
Dr Tedros-a chuan, “Damdawi inte hi beih emaw, insaseng tura tih emaw ni ve lo mah se indona leh sipai tam lutuk avangin damloten an pan thei lo va, thawktuten an tih tur an tih theih loh phah bawk a, WHO pawhin an mamawhte a pe zui thei lo va, hei vang hian hna thawk thei lovin a awm thuai thin,” a ti.
“Hetiang hi vawi tam kan hmu tawh a, a thlen nawn kan phal tawh tur a ni lo,” a ti.
Médecins Sans Frontières (MSF) pawhin Israel-in kar liam ta chhunga lei leh boruak atanga an kah leh insaseng tura an tihna avangin Gaza-a damdawi in 20 vel chu tihchhiat, a nih dan ang tur ni pha lo leh hna thawk thei tawh lo an ni tih an sawi.
Tanpuitu pawl hian Gaza-a mihring enkawlna hmun che thei lova an siam chu titawp nghal turin Israeli thuneitute an phut.
Israel hian Gaza-a puihna lut turte chu March 2 atang khan dangin chawlhkar hnih hnuah, Hamas nena an inkahhai a tawp rualin sipai hmangin a bei zui a. Hei hi Hamas-in mi an la hren 58 chhuah tura an nawr nana an tih niin an sawi a, heng zinga 23 hi an la dam niin an hria.
Kar khat liam ta chhungin Gaza-ah hian mi 600 chuang thi leh hliam 2,000 vel an awm niin Hamas hnuaia health ministry chuan a sawi a. UN chuan mi sang tel baihvaiin an awm thar leh phah niin an sawi bawk.
Khawvel danah damdawi in leh thawktute hi humhimna pek bik an ni a. Damdawi inte chu mi beihna atan te, ralthuam chhek nan leh fighter hrisel thaten tawm nan an hmang a nih loh chuan beih phal a ni lo.
IDF chuan dan hnuaiah zel an che niin an insawi a. Damdawi in an beihte pawh hi Hamas-in dik lo taka an hman vang niin an sawi a, lehlam hian an pha thung.
Israel hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lak nan sipai chakna hmangin Gaza hi an bei a ni.
Hamas health ministry chuan Israel-in an beih hnuah mi 53,655 vel thi an awm tawh niin an sawi.
Israel chetna vangin Gaza-a inenkawlna keh darh vek – WHO chief
